1 Johannes 2

MY ¹kinders, ek skryf hierdie dinge aan julle, ²dat julle nie moet sondig nie; ³en as iemand gesondig het, ⁴ons het ^a’n ⁵Voorspraak ⁶by die Vader, Jesus Christus, ⁷die Regverdige.

En Hy is ^b’n ⁸versoening ⁹vir ons sondes, en nie alleen vir ¹⁰ons s’n nie, maar ook vir dié ^c11van die hele wêreld.

Onderhouding van die gebooie. Broederliefde. Verloëning van die wêreld.

EN hieraan weet ons dat ons ¹²Hom ¹³ken: as ons sy gebooie ¹⁴bewaar.

^dHy wat sê: Ek ken Hom — en sy gebooie nie bewaar nie — is ’n leuenaar en in hom ¹⁵is die waarheid nie.

Maar elkeen wat sy woord bewaar, in hom het ¹⁶die liefde van God waarlik ¹⁷volmaak geword. ^e18Hieraan weet ons dat ons ¹⁹in Hom is.

Hy wat sê dat hy ²⁰in Hom bly, ^fbehoort self ook so te wandel ²¹soos Hy gewandel het.

Broeders, dit is ^g22geen nuwe gebod wat ek aan julle skryf nie, maar ’n ou gebod wat julle ²³van die begin af gehad het. Die ou gebod is die woord wat julle van die begin af gehoor het.

²⁴En tog skryf ek aan julle ^h25’n nuwe gebod ²⁶wat waar is in Hom ²⁷en in julle, ²⁸want ²⁹die duisternis gaan verby en ³⁰die waaragtige lig ³¹skyn alreeds.

Hy wat sê dat hy ³²in die lig is en sy broeder haat, ³³is in die duisternis tot nou toe.

ⁱWie sy broeder liefhet, ^kbly in die lig, en in hom is geen oorsaak van ³⁴struikeling nie.

Maar hy wat sy broeder haat, is in die duisternis en wandel in die duisternis en weet nie ³⁵waarheen hy gaan nie, omdat die duisternis sy oë verblind het.

^lEk skryf aan julle, ³⁶my kinders, ³⁷omdat die sondes julle vergewe is ³⁸om sy Naam ontwil.

Ek skryf aan julle, ³⁹vaders, omdat julle ⁴⁰Hom ken wat ⁴¹van die begin af is. Ek skryf aan julle, ⁴²jongmanne, omdat julle ⁴³die Bose oorwin het. Ek skryf aan julle, ⁴⁴kinders, omdat julle ⁴⁵die Vader ken.

Ek het aan julle geskrywe, vaders, omdat julle Hom ken wat van die begin af is. Ek het aan julle geskrywe, jongmanne, omdat ⁴⁶julle sterk is en ⁴⁷die woord van God in julle bly en julle die Bose oorwin het.

^mMoenie ⁴⁸die wêreld liefhê of die dinge wat in die wêreld is nie. ⁿAs iemand die wêreld liefhet, dan is ⁴⁹die liefde van die Vader ⁵⁰nie in hom nie.

Want ⁵¹alles wat in die wêreld is — ⁵²die begeerlikheid van die vlees en ⁵³die begeerlikheid van die oë en ⁵⁴die grootsheid van die lewe — ⁵⁵is nie uit die Vader nie, maar is ⁵⁶uit die wêreld.

^oEn ⁵⁷die wêreld gaan verby en ⁵⁸sy begeerlikheid, maar hy wat ⁵⁹die wil van God doen, ⁶⁰bly vir ewig.

Die antichriste.

KINDERS, ⁶¹dit is die laaste uur; ^pen soos julle gehoor het dat ⁶²die Antichris ⁶³kom, bestaan daar ook nou ⁶⁴baie antichriste, waaruit ons weet ⁶⁵dat dit die laaste uur is.

^q66Hulle het ⁶⁷van ons ⁶⁸uitgegaan, maar hulle was nie ⁶⁹van ons nie; want as hulle van ons was, sou hulle ⁷⁰by ons ⁷¹gebly het; ^rmaar dit moes aan die lig kom dat hulle nie ⁷²almal van ons is nie.

^s73En julle het ⁷⁴die salwing ⁷⁵van die Heilige en weet ⁷⁶alles.

Ek het nie aan julle geskrywe omdat julle ⁷⁷die waarheid nie ken nie, ⁷⁸maar omdat julle dit ken en omdat ⁷⁹geen leuen uit die waarheid is nie.

Wie is ⁸⁰die leuenaar, behalwe hy wat ontken dat Jesus ⁸¹die Christus is? Dit is die Antichris ⁸²wat die Vader en ⁸³die Seun loën.

^tElkeen wat die Seun loën, ⁸⁴het ook nie die Vader nie.

⁸⁵Wat julle dan van die begin af gehoor het, ⁸⁶laat dit in julle bly. As in julle bly wat julle van die begin af gehoor het, dan sal julle ook ⁸⁷in die Seun en in die Vader bly.

En dit is ⁸⁸die belofte wat Hy ons beloof het, naamlik ⁸⁹die ewige lewe.

Dit het ek aan julle geskrywe met betrekking tot ⁹⁰die wat julle mislei.

^vEn ⁹¹die salwing wat julle van Hom ontvang het, bly in julle, en julle het nie nodig ⁹²dat iemand julle leer nie; maar soos dieselfde salwing julle aangaande ⁹³alles leer, so is ⁹⁴dit ook waar en geen leuen nie; en soos dié julle geleer het, ⁹⁵so moet julle ⁹⁶in Hom bly.

En nou, my kinders, bly ⁹⁷in Hom, ^xsodat ons ⁹⁸vrymoedigheid kan hê wanneer Hy ⁹⁹verskyn en nie ¹⁰⁰beskaamd van Hom weggaan by sy wederkoms nie.

As julle weet dat ¹⁰¹Hy regverdig is, dan weet julle dat elkeen wat ¹⁰²die geregtigheid doen, ¹⁰³uit Hom gebore is.

a 1 Tim. 2:5. Hebr. 7:25.

1 Hy gebruik hierdie woord om sy vriendelikheid teenoor hulle te betoon, soos Christus in Joh. 13:33, en hy noem die gelowiges so, nie net omdat hy baie van hulle deur die verkondiging van die evangelie as ’t ware gebaar het nie, 1 Kor. 4:15. Fil. vers 10, maar ook vanweë sy hoë ouderdom.

2 Dit is, dat julle hierdie leer nie sou misbruik om daardeur makliker te sondig nie.

3 Of: maar.

4 Dit is, dat julle sou weet, en jul daarmee vertroos, dat ons ’n Voorspraak het, ens.

5 Gr. Parakleton. Hierdie titel beteken eintlik ’n advokaat of voorspraak, wat iemand se saak voorhou en uitvoer in die gerig; en word hier aan Christus toegeskryf, omdat Hy by die Vader vir ons intree, Rom. 8:34.

6 Naamlik vir wie ons met ons sondes vertoorn het.

7 Hy word so genoem in Jes. 53:11. Sag. 9:9. Hand. 7:52, omdat Hy sonder enige sonde was, sien 1 Joh. 3:5, en daarom bekwaam om ons Voorspraak te wees, Hebr. 7:26. 1 Petr. 3:18.

b Rom. 3:25. 2 Kor. 5:18. Kol. 1:20. 1 Joh. 4:10.

c Joh. 4:42. 1 Joh. 4:14.

8 Gr. hilasmos, versoening, dit is, Versoener; soos Paulus Hom in dieselfde betekenis hilasterion noem, dit is, versoendeksel, in Rom. 3:25, sien die kanttekening daar. Hy word hier die versoening self genoem, omdat Hy Hom as versoening geoffer het, Joh. 17:19 en die kanttekeninge, Hebr. 10:14, en dat Hy alleen en volmaak ons met God versoen het, Hebr. 9:28.

9 Naamlik omdat Hy daarvoor in ons plek die straf dra en daarmee aan die geregtigheid van God voldoen, stil Hy die toorn van God, en versoen sodoende God met die mense, 2 Kor. 5:21.

10 Naamlik van die apostels en ander gelowiges wat nou lewe.

11 Dit is, van alle mense wat in die hele wêreld uit alle volke, Joh. 11:52. Openb. 5:9, nog in Hom sal glo. Want dat Hy nie ieder en elke mens in die hele wêreld met God versoen nie, blyk sowel uit die ervaring, as daaruit dat Hy nie vir ieder en elke mens tot die Vader gebid het nie, Joh. 17:9, maar slegs vir diegene wat in Hom sal glo, Joh. 17:20.

12 Naamlik Jesus Christus.

13 Naamlik só dat ons Hom ook as ons Saligmaker erken, Hom liefhet, ons vertroue op Hom stel en Hom gehoorsaam. Want hierdie woord beteken hier, soos ook dikwels elders, meer as net blote kennis. Sien Ps. 1:6. Matt. 7:23. 2 Tim. 2:19.

14 Dit is, onderhou, naamlik met opregte vlyt en ywer; hoewel dit in hierdie lewe nie heeltemal volkome gebeur nie. Sien 1 Joh. 1:8.

d 1 Joh. 4:20.

15 Dit verklaar die voorgaande, by wyse van teenstelling, wat hierdie apostel dikwels gebruik.

e Joh. 13:35.

16 Naamlik waarmee ons God liefhet.

17 Of: vervul, dit is, ’n opregte en ware liefde geword, wat ten volle ontwikkel het. Sien 1 Joh. 4:12, 18. Want dat ons geloof of ons liefde in alle grade nie volmaak is in hierdie lewe nie, leer Paulus in 1 Kor. 13:9, en Johannes in 1 Joh. 1:8.

18 Gr. Hierin, naamlik aan die onderhouding van God se Woord, en as ons liefde volmaak geword het.

19 Dit is, met Hom en met sy weldade gemeenskap het.

f Joh. 13:15. 1 Petr. 2:21.

20 Dit is, in sy gemeenskap is en wil bly. Sien Joh. 6:56.

21 Dit is, heilig volgens die voorbeeld van sy lewe, hoewel ons dit in alles nie volmaak kan navolg nie, 1 Joh. 1:8.

g 2 Joh. vers 5.

22 Naamlik as ek met hierdie skrywe die gebod om jul naaste lief te hê aan julle voorhou en ernstig benadruk; wat nie nuut is nie, aangesien dit nie net in die Ou Testament voorgehou word nie, Lev. 19:17, 18, maar ook van die begin van die verkondiging van die evangelie af altyd sterk gedryf is, Matt. 5:44. Joh. 15:12. Rom. 12:10; 13:8.

23 Dit is, vandat julle tot die kennis van Christus geroep is.

h Joh. 13:34; 15:12.

24 Of: Weereens.

25 Dit is, wat op ’n nuwe wyse deur Christus en sy apostels voorgehou en gedryf word, met sy eie voorbeeld en besondere liefde bevestig is, en deur die Gees van God in die harte van gelowiges ingeskryf word, volgens die beloftes van die nuwe verbond, Jer. 31:33. Sien Joh. 13:34 en die kanttekening.

26 Dit is, die liefde wat waarlik in Christus teenoor ons is, moet ook waarlik in julle wees. Sien Joh. 13:34.

27 Of: is ook.

28 Of: dat die duisternis verbygaan, ens.

29 Naamlik van onwetendheid en goddeloosheid, wat tevore in die wêreld was voordat die evangelie verkondig is. Sien dergelike in Rom. 13:12. 1 Thess. 5:4. 1 Petr. 2:9.

30 Naamlik van die saligmakende kennis van God en van sy beloftes en gebooie, Ef. 5:8. 1 Joh. 1:7; 2:9.

31 Naamlik in die leer van die evangelie, wat ons verkondig.

32 Dit is, die leer van die evangelie ken en aanneem.

33 Dit is, hy steek nog vas in die voorgaande onwetendheid en blindheid; en is daarom geen ware Christen nie.

i 1 Joh. 3:14.

k Joh. 12:35.

34 Of: aanstoot, ergernis. Gr. skandalon; dit beteken ’n klip of iets dergeliks, wat in die pad lê, waarteen ’n mens stamp, en waardeur ’n mens tot ’n val gebring word, wat maklik gebeur as ’n mens in die duisternis wandel; maar hy wat in die lig wandel, kan so ’n struikelblok maklik vermy, as hy goed voor hom kyk, die apostel sê hier dat die ware gelowiges dit doen. Sien dergelike in Ps. 119:165. Joh. 11:9, 10.

35 Naamlik of hy op die regte pad gaan of nie. Of weet nie dat hy sy verderf tegemoetgaan nie.

l Luk. 24:47. Hand. 4:12; 13:38.

36 Soos tevore in vers 1. Die indeling volgens ouderdom begin nog nie hier nie, maar in die volgende vers.

37 Of: dat die sondes julle vergewe is. So ook in verse 13, 14.

38 Dit is, om Christus Jesus ontwil. Sien Hand. 4:12; 10:43 en die kanttekeninge daar.

39 Dit is, ou mense, wat deur jul jare baie kennis verkry het.

40 Naamlik Jesus Christus.

41 Naamlik van die wêreld, dit is, van ewigheid af. Sien 1 Joh. 1:1.

42 Naamlik wat in die beste jare van jul lewe is, en bekwaam om te stry.

43 Dit is, die duiwel, Matt. 6:13; 13:19.

44 Naamlik wat nog jonk van jare is, wie se amp en eer dit is om hul ouers reg te ken, te respekteer en lief te hê.

45 Naamlik van ons Here Jesus Christus, wat ook om Christus ontwil ons Vader geword het, Joh. 20:17.

46 Dit is, soos jong mense gewoonlik sterk van liggaam is, so moet hulle ook sterk in die geloof wees om teen die duiwel te stry, 1 Petr. 5:9.

47 Naamlik wat die geestelike swaard is, waarmee julle teen die duiwel moet stry, Ef. 6:17.

m Rom. 12:2.

n Gal. 1:10. Jak. 4:4.

48 Dit is, die dinge wat buite die regte kennis en diens van God in hierdie wêreld deur wêreldse mense hooggeag, begeer en nagejaag word, wat in die volgende vers genoem word. Sien Jak. 4:4.

49 Naamlik waarmee ons God die Vader liefhet.

50 Naamlik omdat hierdie tweërlei liefdes hulle uitstrek tot sake wat teen mekaar stry, nie tesame kan bestaan nie, en die een liefde die ander uitdryf. Sien Matt. 6:24.

51 Dit is, alles wat die wêreldse mense liefhet en najaag, lê opgesluit in hierdie drie soorte wat hier genoem word.

52 Dit is, die wellustigheid. Sien Rom. 13:14.

53 Dit is, die gierigheid en begeerte van rykdom, wat hier van die oë genoem word, omdat die aanskouing van hierdie goedere die begeerte daarvan opwek, en dat die oë van die gierigaards nooit daarmee versadig word nie, maar alles wil hê wat hulle sien. Sien Spr. 27:20. Pred. 4:8.

54 Of: trotsheid, dit is, die eergierigheid of hoogmoedigheid, wat die wêreldse mense in hul status en lewe in alle opsigte betoon in groot prag, praal en verheffing bo hul naaste. Terwyl die apostel hierdie sondes beskryf, gee hy hulle die naam van begeerlikheid, omdat dit uit die aangebore verdorwenheid voortkom, Jak. 1:15, om sodoende die wortel daarvan aan die kaak te stel.

55 Dit is, is nie deur God in die mense se harte ingeplant nie, en behaag God nie.

56 Dit is, uit die verdorwe natuur van die wêreldse mense.

o Ps. 90:10. Jes. 40:6. 1 Kor. 7:31. Jak. 1:10; 4:14. 1 Petr. 1:24.

57 Dit is, die wêreldse mense.

58 Dit is, al die goedere en welluste waartoe hulle begeerlikheid strek.

59 Naamlik in die wegvlug van hierdie begeerlikhede en sondes.

60 Dit is, sal die ewige lewe hê.

p Matt. 24:5. 2 Thess. 2:3.

61 Dit is, ons beleef nou die laaste tyd van die wêreld, waaroor tevore gesê is dat die Antichris daarin sal kom en dat baie valse leraars sal opstaan. Sien Matt. 24:5. 1 Kor. 10:11. 2 Thess. 2:3. 1 Tim. 4:1. 2 Tim. 3:1. 2 Petr. 3:3.

62 Gr. ho antichristos; die woord beteken in die algemeen iemand wat hom, onder die naam van Christen, teen die leer van Christus se persoon en amp stel; en in die besonder een onder hulle wat besonderlik uitstaan, wat nie bestaan in slegs een persoon nie, maar in verskeie persone wat mekaar in ’n staat opvolg of in mekaar se plek kom, soos ’n mens onder die keiser van Rome dikwels nie net die regerende keiser verstaan nie, maar ook al diegene wat in die keiserryk die een ná die ander opvolg. Hier spreek die apostel van die uitstaande Antichris, soos die Griekse woordjie ho te kenne gee, wat in 2 Thess. 2:3, ens., en in die Openbaring van Johannes deurgaans beskryf word.

63 Dit is, sal kom, of as ’t ware op pad is om te kom. Sien 2 Thess. 2:7.

64 Dit is, baie valse leraars onder die Christene, wat voorlopers van die groot Antichris is, en deur een gees gedryf, want hier word daardie woord in die algemeen en breedvoerig gebruik.

65 Naamlik volgens die voorseggings van Christus en die apostels, tevore opgeteken.

q Ps. 41:10. Hand. 20:30.

r 1 Kor. 11:19.

66 Naamlik hierdie antichriste en valse leraars.

67 Naamlik Christene of Christelike vergaderings.

68 Dit is, hulle het uit ons voortgekom, het opgestaan en het hulle van ons afgesonder.

69 Dit is, van die ware en opregte Christene, of van die opregte en regsinnige leraars nie.

70 Naamlik opregte Christene en leraars.

71 Naamlik in die eenheid van die geloof en by die waarheid.

72 Naamlik wat hulleself Christene noem en hul leer met Christus se Naam beklee. Sien Matt. 7:21.

s Ps. 45:8; 133:2. 2 Kor. 1:21. Hebr. 1:9.

73 Die apostel wys nou vir die gelowiges die regte middel aan om aan die verleidings van die antichriste te ontkom, naamlik dat hulle vas bly staan in die leer wat hulle deur die verligting van die Heilige Gees eens geleer en aangeneem het.

74 Of: die salf; waardeur hy die genadige werking van die Heilige Gees verstaan, waardeur hulle wedergebore en met die saligmakende kennis van Christus verlig en versterk is, wat met die uitgieting van kosbare salf vergelyk word. Sien Ps. 45:8; 133:2.

75 Dit is, van Christus Jesus, wat so genoem word in Ps. 16:10; Dan. 9:24; Hand. 2:27 en die kanttekeninge; en die rede in Hebr. 7:26. Alle gelowiges het van Hom hierdie gawe ontvang, Joël 2:28. Joh. 1:16; 14:26.

76 Naamlik wat julle tot saligheid nodig het om te weet, en waaroor ek vir julle skryf.

77 Naamlik van die leer van die evangelie.

78 Dit is, om die gedagtenis van dit wat julle weet vir julle te verfris, en jul daardeur in die waarheid meer en meer te versterk teen die verleidings.

79 Gr. dat alle leuen uit die waarheid nie is nie, dit is, omdat geen leuen (dit is, geen valse leer), uit die waarheid (dit is, uit die leer van die evangelie wat ons verkondig), is nie.

80 Dit is, die vernaamste valse leraar.

81 Gr. nie is nie, dit is, wat die waarheid loën en sê dat Jesus nie die Christus, dit is, die Messías, die Gesalfde, die beloofde Saligmaker, is nie. Sien Joh. 20:31.

82 Hoe die Vader geloën word, word nader in die volgende vers verklaar.

83 Die Seun van God, die Here Jesus Christus, word geloën, nie net ten opsigte van sy persoon wanneer ’n mens óf sy goddelike, óf sy ware menslike natuur, óf dergelike loën nie. Maar ook ten opsigte van sy amp, as ’n mens ontken dat Hy die Saligmaker is, of dat Hy die enige en volmaakte Saligmaker is, en as ’n mens benewens Hom nog ander middelaars tot die saligheid stel, ens.

t Luk. 12:9. 2 Tim. 2:12.

84 Dit is, loën ook geheel en al die Vader, omdat die Vader nie sonder sy Seun kan wees nie, of reg geken word nie. Sien Joh. 8:19; 10:30. In sommige Griekse manuskripte word die volgende woorde ook hier bygevoeg: wie die Seun bely, het ook die Vader.

85 Naamlik van die suiwer leer van die evangelie, wat deur Christus en die apostels van die begin af aan julle verkondig is.

86 Dit is, volhard julle standvastig daarin.

87 Dit is, in die opregte en saligmakende leer van die Vader en van die Seun. Of: in die gemeenskap van die Vader en van die Seun, 1 Joh. 1:3.

88 Dit is, wat Christus vir ons in die evangelie beloof het.

89 Sien Matt. 19:29; 25:46. Joh. 3:15, 16; 5:24; 6:33, 54; 10:10; 17:2, en deurlopend in die evangelie.

90 Naamlik sodat julle des te beter en sorgvuldiger teen hul verleiding kan waak.

v Jer. 31:34. Hebr. 8:11.

91 Dit is, dieselfde genade van die Heilige Gees, wat Christus vir julle gegee het, om jul te verlig met die kennis van die waarheid; soos in vers 20.

92 Naamlik hierdie dinge, omdat julle dit reeds weet, of die gronde van die Christelike leer, wat julle reeds gelê het.

93 Dit is, al hierdie dinge; of: alles wat julle nodig het om te weet tot saligheid. Sien vers 20.

94 Naamlik die salwing.

95 Dit is, so bly in Hom; ’n Hebreeuse spreekwyse. Of hy spreek so om die goeie vertroue te toon, wat hy in hul standvastigheid gehad het.

96 Naamlik in Christus; soos uit die volgende vers en vers 24 blyk.

x Mark. 8:38. 1 Joh. 3:2.

97 Naamlik in Christus, dit is, in sy gemeenskap en leer, deur dit in geloof vas te hou.

98 Naamlik om voor Hom te bestaan in sy oordeel, deur te vertrou dat Hy ons nie sal verdoem nie, maar sal vryspreek.

99 Naamlik in sy koms om te oordeel, soos die volgende woorde verklaar. Sien ook 1 Joh. 3:2.

100 Of: beskaamd voor Hom weggaan. Naamlik soos alle ongelowiges en goddeloses sal ondervind.

101 Naamlik God die Vader, of Christus, van wie hy in die voorgaande woorde gespreek het.

102 Dit is, wat godsalig leef.

103 Dit is, geestelik deur Hom wedergebore is. Sien 1 Joh. 3:9.