1 Petrus 2

LÊ¹ ^adan af alle boosheid en alle bedrog en geveinsdheid en afguns en alle kwaadpratery;

en ²verlang sterk ³soos pasgebore kindertjies na die ⁴onvervalste melk ⁵van die woord, dat julle daardeur kan opgroei,

as julle ten minste ^b6gesmaak het dat ⁷die Here goedertieren is.

^cKom na ⁸Hom toe, ⁹die lewende steen wat ¹⁰deur die mense wel verwerp is, maar by God uitverkore en kosbaar is;

en laat julle ook soos ¹¹lewende stene ¹²opbou, tot ^d’n geestelike huis, ^e’n heilige priesterdom, ¹³om ^fgeestelike offers te bring wat aan God welgevallig is ¹⁴deur Jesus Christus.

¹⁵Daarom staan dit ook in die Skrif: ^gKyk, Ek lê in Sion ’n uitverkore en kosbare ¹⁶hoeksteen, en die wat in Hom glo, sal ¹⁷nooit beskaam word nie.

Vir julle dan wat glo, is Hy ¹⁸kosbaar; ¹⁹maar vir die ongelowiges geld die woord: ^hDie steen wat die bouers verwerp het, ²⁰dit het ’n hoeksteen geword; en: ⁱ²¹’n Steen van aanstoot en ’n rots van struikeling —

vir dié wat hulle daarteen stamp, omdat hulle aan die woord ongehoorsaam is, ²²waarvoor hulle ook bestem is.

^kMaar ²³julle is ²⁴’n uitverkore geslag, ^l25’n koninklike priesterdom, ’n heilige volk, ²⁶’n volk as eiendom verkry, om te verkondig ²⁷die deugde van Hom wat julle ²⁸uit die duisternis geroep het ²⁹tot sy wonderbare lig,

^m30julle wat vroeër geen volk was nie, maar nou die volk van God is; aan wie toe geen barmhartigheid bewys is nie, maar nou bewys is.

Die eerbare lewenswandel onder die heidene. Onderwerping aan die owerheid.

GELIEFDES, ek vermaan julle ³¹as bywoners en vreemdelinge ⁿom julle te onthou van vleeslike begeertes wat stryd voer ³²teen die siel;

^oen hou julle lewenswandel onder die heidene skoon, ^psodat as hulle van julle kwaad spreek soos van kwaaddoeners, ^qhulle op grond van die goeie werke wat hulle aanskou, God kan verheerlik ^r33in die dag van besoeking.

^sWees dan ³⁴onderdanig aan elke ³⁵menslike verordening ³⁶ter wille van die Here — of dit ³⁷die koning is as opperheer,

of die goewerneurs as sy gesante, om wel kwaaddoeners te ³⁸straf, maar die wat goed doen, te prys.

Want so is dit die wil van God ^tdat julle deur goed te doen die onkunde van die dwase mense ³⁹tot swye sal bring,

^v40as vrymense en nie asof julle die vryheid het as ’n dekmantel vir die boosheid nie, maar as diensknegte van God.

^xJulle moet almal ⁴¹eer, ^y42die broederskap liefhê, God vrees, ^zdie koning eer.

Pligte van Christelike diensknegte.

^aDIENSKNEGTE, wees julle here ⁴³onderdanig ⁴⁴met alle vrees, nie alleen aan die wat goed en vriendelik is nie, maar ook aan ⁴⁵die wat verkeerd is.

^bWant ⁴⁶dit is genade as iemand, ⁴⁷ter wille van die gewete voor God, ⁴⁸leed verdra deur onregverdig te ly.

Want ⁴⁹watter roem is daar as julle verdra ⁵⁰wanneer julle sonde doen en ⁵¹geslaan word? ^cMaar as julle verdra wanneer julle ⁵²goed doen en ly — dit is genade by God.

Want ⁵³hiertoe is julle geroep, omdat Christus ook vir julle gely het en ^djulle ⁵⁴’n voorbeeld nagelaat het, sodat julle ⁵⁵sy voetstappe kan navolg;

^eHy wat geen sonde gedoen het nie, en in wie se mond geen bedrog gevind is nie;

^fwat, toe Hy uitgeskel is, nie terug uitgeskel het nie; toe Hy gely het, nie gedreig het nie, maar ⁵⁶dit oorgegee het aan Hom wat regverdig oordeel;

^gwat ⁵⁷self ons sondes in sy liggaam ⁵⁸op die kruishout gedra het, ^hsodat ons die sondes kan ⁵⁹afsterwe en vir die geregtigheid lewe; deur wie se ⁶⁰wonde julle genees is.

Want julle was ⁱ⁶¹soos dwalende skape, maar nou het julle teruggekeer na die Herder en ⁶²Opsiener van julle siele.

a Matt. 18:3. Rom. 6:4. 1 Kor. 14:20. Ef. 4:23. Kol. 3:8. Hebr. 12:1.

1 Naamlik omdat julle wedergebore is uit hierdie onverganklike saad van die lewende God. Want hierdie vermaning volg uit dit wat in die voorgaande hoofstuk gesê is.

2 Naamlik na julle geestelike voedsel, en versterking van die nuwe mens, wat reeds in julle is.

3 Dit is, soos mense wat nou kort gelede deur God se Gees en Woord wedergebore is.

4 Petrus voeg dit by, want, soos die suiwer melk die regte voeding gee, net so gee ook die Woord van God, wat onvervals is, die regte voeding vir die siel en die geestelike mens.

5 Dit is, die geestelike melk, gestel teenoor die liggaamlike melk, wat die pasgebore kindertjies begeer. Ander verstaan dit as woordelike melk, dit is, wat in die Woord van God bestaan, om aan te dui dat, soos die Woord van God die geestelike saad van ons wedergeboorte is, dieselfde Woord ook die geestelike voedsel daarvan is. Die Griekse woord logikon wat hier vertaal word met van die woord, word in Rom. 12:1 vertaal met redelike.

b Ps. 34:9.

6 Dit is, gevoel het, gewaargeword het in julle gemoed, naamlik deur die krag van God se Woord en Gees. Hy gaan dan nog voort in die beeld van die kinders, wat deur hul smaak die regte melk van hulle moeders maklik van die vervalste melk kan onderskei, deur die een aan te neem, en die ander te verwerp. Sien Joh. 10:4, 5.

7 Naamlik Jesus Christus, soos die volgende vers dit stel.

c Ef. 2:20.

8 Naamlik die Here Jesus, soos die volgende verse dit stel.

9 Dit is, die geestelike steen. Christus word so genoem teenoor die lewelose stene van die seremoniële tempel, wat ’n afbeelding van die geestelike huis van God was, dit is, van sy gemeente, waarin God met sy Gees en genade woon, 1 Kor. 3:16, waarvan Christus die fondament is, 1 Kor. 3:11, en die hoeksteen, op wie sowel Jode as heidene tot ’n tempel van God gebou word. Sien ook Ef. 2:20-22.

10 Dit is, deur ’n groot deel van die mense, wêreldse en ongelowige, veral die Jode en hul owerstes.

d Hebr. 3:6.

e Openb. 1:6; 5:10.

f Rom. 12:1. Hebr. 12:28.

11 Dit is, geestelike stene, soos hierna verklaar word.

12 Dit is, meer en meer deur die geloof verenig.

13 Naamlik van dankbaarheid, wat in die Nuwe Testament slegs van alle gelowiges vereis word; so is daar die offer van ons liggame, dit is, van onsself, vir die Here tot ’n eiendom, Rom. 12:1, 2, en die lofoffer en offer van ons gebede voor God, asook van die weldadigheid teenoor ons naaste, vers 9. Hebr. 13:15, 16. Openb. 8:3, 4.

14 Want soos ons persoon nie vir God aangenaam is behalwe deur die geloof in Jesus Christus nie, Rom. 5:1; 8:39, so kan ons werke, vanweë hul onvolmaaktheid, ook nie God behaag nie, behalwe as dit in Christus Jesus is, en om sy ontwil. Sien Hebr. 11:4; 13:15, 21.

g Jes. 28:16.

15 Naamlik ten dele in Jes. 8:14 en 28:16, en ten dele in Ps. 118:22, waaruit die apostel Petrus hierdie woorde aanhaal, terwyl hy enkele woorde uitlaat, wat nie gedien het tot sy voorneme nie, tog gee hy die betekenis daarvan suiwer weer. Ander vertaal: Daarom vervat Hy (naamlik God) ook in die Skrif.

16 Sien hieroor vers 4 se kanttekening.

17 Dit is, nie in sy verwagting bedrieg word nie; soos in Rom. 5:5; 10:11.

h Ps. 118:22. Matt. 21:42. Hand. 4:11.

i Jes. 8:14. Rom. 9:33.

18 Of: heerlik. Gr. kosbaarheid, of heerlikheid; dit is, baie heerlik of kosbaar.

19 Naamlik in Ps. 118:22. Jes. 8:14. Sien die verklaring daarvan in Matt. 21:42. Ef. 2:20.

20 Naamlik vir God se gemeente, nieteenstaande alle weerstand en oproer wat die ongelowiges daarteen onderneem het.

21 Naamlik vir die ongelowiges, wat hulle deur ongeloof teen hierdie steen gekant het, soos die volgende vers verklaar.

22 Dit is, waarvoor hulle ook verordineer is, soos die woord bestem of aanstel ook gebruik word in Joh. 15:16. Hand. 13:47. 1 Thess. 5:9. Nie dat God iemand sou bestem of ordineer om aan sy Woord ongehoorsaam te wees nie (aangesien dit sonde sou wees), want dit sou teen God se natuur stry, Ps. 5:5. Jak. 1:13; maar omdat God hierdie halsstarrige mense deur sy regverdige oordeel aan hul halsstarrigheid oorgegee het, om hul ongehoorsaamheid teenoor Christus meer en meer bloot te lê, Luk. 2:34, en dat hulle hul sodoende die verdiende straf en toorn van God met hul ongehoorsaamheid meer en meer op die hals haal. Sien Jes. 8:14. Matt. 21:44. Rom. 1:24 en 9:17 se kanttekeninge.

k Ex. 19:5. Deut. 7:6; 14:2; 26:18. Ef. 1:14.

l Openb. 1:6; 5:10.

23 Naamlik die wat Christus met ’n ware geloof aangeneem het.

24 Dit is, al hierdie voorregte en eretitels, wat ten opsigte van die uiterlike verbond aan die hele volk Israel deurgaans gegee word, en in die besonder in Ex. 19:5, 6. Deut. 26:18, 19, kom julle inderwaarheid toe. Sien ook Mal. 3:16, 17. Rom. 9:8.

25 Dit is, konings en priesters, soos Johannes spreek in Openb. 1:6. Moses sê in Ex. 19:6: ’n koninkryk van priesters. Maar die apostel volg hier die Griekse vertaling, omdat dit dieselfde betekenis het.

26 Gr. ’n volk tot verkryging, dit is, wat God vir Hom deur sy bloed as eiendom verkry het, Hand. 20:28.

27 Dit is, die eienskappe, naamlik die wysheid, mag, regverdigheid, genade en barmhartigheid van God.

28 Naamlik van onwetendheid en natuurlike boosheid.

29 Dit is, tot heiligheid en ware kennis van God. Sien Hand. 26:18.

m Hos. 1:10; 2:22. Rom. 9:26.

30 Hierdie woorde is geneem uit Hos. 2:22. Die apostel verklaar dit hier van die verstrooide Jode wat tot Christus bekeer is, en Paulus, Rom. 9:25, ook van die bekeerde heidene, wat nou albei een volk van God in Christus is, Ef. 2:13, ens.

n Rom. 13:14. Gal. 5:16.

31 Of: inwoners, sien oor hierdie woord 1 Petr. 1:17 se kanttekening.

32 Dit is, teen die saligheid van die siel, naamlik om dit te verderf. Hier bedoel Petrus ’n stryd van buite af. Paulus bedoel ’n ander saak in Rom. 7:23. Gal. 5:17, as hy die innerlike stryd van die vlees en die Gees teenoor mekaar beskryf.

o Rom. 12:17. 2 Kor. 8:21. Filip. 2:15.

p Tit. 2:8. 1 Petr. 3:16.

q Matt. 5:16.

r Luk. 1:68; 19:44.

33 Dit is, in die tyd as die Here hulle deur sy genade tot bekering sal besoek. Sien dergelike in Luk. 1:68; 19:44. Ander verstaan dit as die dag waarop die gelowiges deur die ongelowiges versoek of vervolg word; omdat dit dikwels gebeur dat die vervolgers, as hulle die godsaligheid en lydsaamheid van die vervolgdes sien, daardeur tot nadenke gebring word, en dat hulle God, wie se kinders hulle tevore vervolg het, selfs begin prys.

s Rom. 13:1. Tit. 3:1.

34 Naamlik in alles wat hulle jul beveel, indien dit nie met God en sy bevel in stryd is nie. Sien Hand. 4:19.

35 Gr. menslike skepping; sommige meen dat hierdie woorde die owerheid self aandui, wat so genoem word omdat dit uit mense bestaan en gewoonlik deur mense daargestel word. Ander verstaan dit as die verordeninge en wette wat die owerheid tot onderhouding van die burgerlike samehorigheid en welvaart opstel. Maar die eerste verklaring kom des te beter met die volgende woorde ooreen.

36 Dit is, omdat dit God se wil is om julle deur hulle te regeer. Sien Rom. 13:1. 1 Tim. 2:2.

37 Hierdeur word die Romeinse keiser verstaan, onder wie se heerskappy die provinsies in daardie tyd gestaan het.

38 Of: wraak (wreek).

t Tit. 2:8.

39 Dit is, sodat hulle geen rede het om teen julle te laster nie. ’n Beeld geneem van perde of bulle, in wie se bekke ’n mens ’n stang sit, of muilband, om hulle te keer om kwaad te doen. Sien Matt. 22:34. 1 Kor. 9:9.

v Joh. 8:32. Rom. 6:18. Gal. 5:1.

40 Dit is, wel deur Christus van die heerskappy van die duiwel en van die sonde vrygemaak, maar nie om julle onder hierdie dekmantel aan die gehoorsaamheid van die owerhede te onttrek, of kwaad te doen nie; maar om God te dien en sy wette te gehoorsaam.

x Rom. 12:10. 1 Petr. 5:5.

y Rom. 12:10. Ef. 4:3. Hebr. 13:1. 1 Petr. 1:22.

z Matt. 22:21.

41 Naamlik met die eer wat hulle volgens hul aansien en beroep toekom.

42 Dit is, die broeders en hul Christelike byeenkomste; soos in 1 Petr. 5:9.

a Ef. 6:5. Kol. 3:22. 1 Tim. 6:1. Tit. 2:9.

43 Naamlik in die Here, soos Paulus byvoeg, Ef. 6:1.

44 Naamlik nie net vir die straf nie, maar ook vir die oortreding van hul gebooie, en met sorgvuldigheid om hulle nie te vertoorn nie, soveel dit in julle vermoë is.

45 Gr. skolios, dit is, die verdraaides, krommes, slinkses.

b Matt. 5:10.

46 Naamlik by God, soos dit aan die einde van vers 20 daarby gevoeg word, naamlik, dit is vir God aangenaam.

47 Gr. ter wille van die gewete van God (verstaan hiermee die gewete van die mens ten opsigte van God), dit is, omdat hy hom in sy gewete daaraan verbind om God bo almal te dien en te gehoorsaam.

48 Gr. droefhede.

c 1 Petr. 3:14; 4:14.

49 Naamlik voor God, soos aan die einde van die vers.

50 Dit is, as julle die wettige gebod van jul here verag of oortree.

51 Gr. met vuiste geslaan word.

52 Dit is, God dien en sy gebooie gehoorsaam.

d Joh. 13:15. Filip. 2:5. 1 Joh. 2:6.

53 Naamlik as dissipels van Christus, sodat julle sy kruis sou dra, Matt. 10:38; 16:24, ens.

54 Of: patroon, skryfvoorbeeld. ’n Beeld geneem van skilders of skryfmeesters.

55 Naamlik nie net in sy lyding nie, maar ook in sy lydsaamheid, soos hierna volg.

e Jes. 53:9. 2 Kor. 5:21. 1 Joh. 3:5.

f Matt. 27:39. Joh. 8:48, 49.

56 Dit is, sy saak oorgegee het, of: sy saak beveel het. Of: Homself oorgegee het, of: die wraak oorgegee het.

g Jes. 53:4. Matt. 8:17.

h Rom. 6:11.

57 Naamlik as ’n offer vir ons sondes, om deur die straf wat Hy daarvoor na liggaam en siel gely het, die sondes te vernietig, soos die bok van versoening die sondes van die volk opgelê is, Lev. 16:21, en soos Jesaja daarvan profeteer, Jes. 53:4, en Paulus verklaar in 2 Kor. 5:21.

58 Gr. aan die hout.

59 Of: afskei, naamlik deur die krag van sy dood en sy voldoening.

60 Gr. wond, of: merk, streep, haal, naamlik wat Hy ter wille van ons gedra het; die apostel verkies doelbewus hierdie Griekse woord, aangesien die diensknegte, omdat hulle Christene was, dikwels dergelike slae en wonde van hul harde here moes verdra het.

i Jes. 53:6. Eség. 34:6. Luk. 15:4.

61 Naamlik in julle onwetendheid en blindheid. Die apostel verwys hier na Jes. 53:6.

62 Gr. Episkopon, dit is, Opsigter of Opsiener, dit is, Hy wat sorg dra vir die saligheid van julle siele, al is dit so dat julle liggame hier dikwels mishandel word. Sien Matt. 10:28.