Filippense 3

Waarskuwing teen valse apostels. Vermaning om die vrugte van die Gees voort te bring.

VERDER, my broeders, ^averbly julle ¹in die Here. ²Dit is vir my nie lastig ³om dieselfde dinge aan julle te skrywe nie, en ⁴dit gee julle sekerheid.

^b5Let op die honde; let op die ⁶slegte arbeiders; let op die ⁷versnyding.

^cWant ⁸óns is ⁹die besnydenis, ons wat ^dGod ¹⁰in die Gees dien en ¹¹in Christus Jesus roem en nie op ¹²die vlees vertrou nie;

¹³alhoewel ek rede het om ook te vertrou op die vlees. As ¹⁴iemand anders meen dat hy op die vlees kan vertrou, ^e15ek nog meer.

Ek is ¹⁶besny op die agtste dag, uit die geslag van ^fIsrael, uit die stam van ^gBenjamin, ’n Hebreër uit die Hebreërs; ¹⁷wat die wet betref, ^h’n Fariseër;

¹⁸wat ywer betref, ⁱ’n vervolger ¹⁹van die gemeente; wat die geregtigheid ²⁰in die wet betref, ²¹onberispelik.

^kMaar ²²wat vir my wins was, dit het ek om Christus wil ²³skade geag.

Ja waarlik, ²⁴ek ag ook ²⁵alles skade ^lom die uitnemendheid ²⁶van die kennis van Christus Jesus, my Here, ter wille van wie ek ²⁷alles prysgegee het en as ²⁸drek beskou, om ²⁹Christus as wins te verkry

en ³⁰in Hom ³¹gevind te word, ³²nie met my geregtigheid ³³wat uit die wet is nie, maar ³⁴met dié wat deur die geloof in Christus is, ³⁵die geregtigheid ^m36wat uit God is ³⁷deur die geloof;

³⁸sodat ek ³⁹Hom kan ⁴⁰ken en ⁴¹die krag van sy opstanding ⁿen ⁴²die gemeenskap aan sy lyde terwyl ek aan ⁴³sy dood gelykvormig word,

⁴⁴of ek miskien ⁴⁵die opstanding uit die dode kan bereik.

Nie dat ek ⁴⁶dit al verkry het of al ⁴⁷volmaak is nie, maar ⁴⁸ek jaag daarna ⁴⁹of ek dit ook kan gryp, ⁵⁰omdat ⁵¹ek ook deur Christus Jesus gegryp is.

Broeders, ⁵²ek reken nie dat ek dit self gegryp het nie.

Maar ⁵³een ding: ek ⁵⁴vergeet die dinge ⁵⁵wat agter is en ⁵⁶strek my uit ⁵⁷na wat voor is, ^oen ⁵⁸jaag ⁵⁹na die doel ⁶⁰om die prys te verkry van die ⁶¹hoë roeping van God ⁶²in Christus Jesus.

Laat ons almal dan wat ⁶³volmaak is, ⁶⁴so gesind wees; en as julle ⁶⁵anders gesind is, sal God ⁶⁶dit ook aan julle openbaar.

Maar ⁶⁷wat ons reeds bereik het — laat ons ^pvolgens ⁶⁸dieselfde reël wandel, ^qlaat ons eensgesind wees.

Wees ⁶⁹ook ^r70my navolgers, broeders, en let op die wat ⁷¹so wandel soos julle ons ^stot voorbeeld het.

^tWant ⁷²baie — van wie ek julle dit ⁷³dikwels gesê het en ⁷⁴nou ook ⁷⁵onder trane sê — wandel as ⁷⁶vyande van die kruis van Christus.

⁷⁷Hulle einde is die verderf, hulle ⁷⁸god is die buik en hulle ⁷⁹eer ⁸⁰is in hulle skande; hulle ⁸¹bedink ⁸²aardse dinge.

^vWant ⁸³ons burgerskap ⁸⁴is in die hemele, ^x85van waar ons ook as Verlosser ⁸⁶verwag die Here Jesus Christus,

^ywat ons ⁸⁷vernederde liggaam van gedaante sal ⁸⁸verander, om ⁸⁹gelykvormig te word aan ⁹⁰sy verheerlikte liggaam ⁹¹volgens die werking waardeur Hy ook alles aan Homself kan onderwerp.

a Filip. 4:4. Jak. 1:2. 1 Petr. 4:13.

1 Dit is, oor die genade wat die Here aan ons bewys het. Of: met ’n vreugde wat vir die Here aangenaam is, naamlik te midde van die verdrukkinge.

2 Of: Dit is vir my nie swaar, moeilik, te veel nie.

3 Naamlik wat ek julle tevore mondelings geleer het. Sien 2 Thess. 2:15.

4 Dit is, dit strek en dien tot julle versekering, om daardeur meer en meer in die waarheid van die Christelike leer en in die geloof bevestig te word.

b Jes. 56:10.

5 Dit is, weerhou julle van die valse apostels, wat hy met hierdie smadelike naam van honde noem om hul aard uit te druk, dat hulle die ware leraars onbeskaamd met hul lasteringe aanblaf en byt.

6 Dit is, wat wel baie werk en moeite aanvaar, maar om ’n bose en verderflike leer by die mense in te plant.

7 Dit is, diegene wat uit die besnydenis is, daarop roem, en leer dat die besnydenis tot saligheid noodsaaklik is. Dit mag nie soseer ’n besnyding genoem word nie, maar eerder met reg ’n versnyding. Die apostel verander hier met groot vernuf die woord besnyding na versnyding, aangesien die leer van hierdie valse apostels die mense wat dit aanneem, van Christus afsny, en hulle tot die verderf as ’t ware in stukke versny.

c Deut. 10:16; 30:6. Jer. 4:4. Rom. 2:29. Kol. 2:11.

d Joh. 4:24.

8 Naamlik wat ons geregtigheid in Christus alleen soek en stel, soos hierna verklaar word.

9 Dit is, die ware besnydenis wat vir God geld, wat die inwendige besnydenis van die hart is. Sien Rom. 2:29.

10 Of: deur die krag van die Heilige Gees. Of: met die gees, dit is, inwendig met die siel en die hart, Joh. 4:24. Ef. 6:18.

11 Naamlik dat ons in Hom en in sy geregtigheid alleen ons saligheid het, 1 Kor. 1:30, 31.

12 Dit is, op die uiterlike seremonies van die wet of uiterlike besnydenis van die vlees en die onderhouding daarvan, om daardeur salig te word. Dit word gestel teenoor die woord gees, wat tevore gebruik is.

e 2 Kor. 11:21.

13 Gr. alhoewel ek vertroue het ook in die vlees, dit is, alhoewel ek ook rede het aangaande die uiterlike besnydenis en ander seremonies van die wet, asook die uiterlike voordele van die Jode, om daarop te vertrou, naamlik indien ’n mens sy vertroue om salig te word daarop sou kon stel.

14 Naamlik van hierdie valse apostels, wat altyd op daardie uiterlike baie geroem, en hul saligheid daarin gesoek het.

15 Dit is, ek sou daarin nog meer rede hê om te vertrou.

f 2 Kor. 11:22.

g Gén. 49:27.

h Hand. 23:6.

16 Gr. agtdagse besnydenis.

17 Dit is, ten opsigte van die verstaan van die wet; of: uit die drie partye wat onder die Joodse volk was, Sadduseërs, Esseners en Fariseërs, het ek aan die party van die Fariseërs behoort, wat as die strengste beskou was, Hand. 26:5.

i Hand. 8:3; 9:1; 22:3, 4. Gal. 1:13. 1 Tim. 1:13.

18 Naamlik vir die onderhouding van die seremonies van die wet; waarin die valse apostels ook baie, egter verkeerdelik, geywer het.

19 Naamlik van die Christene, wat hul saligheid nie in die werke van die wet gesoek het nie, maar in Christus alleen.

20 Dit is, wat die wet uiterlik van die mense eis.

21 Naamlik sodat die mense my nie kon bestraf oor enige moedswillige oortreding van die wet nie, omdat my uiterlike werke aan die wet van God gelykvormig was. Hy verklaar dat hy nogtans nie daardeur geregverdig is nie, 1 Kor. 4:4.

k Matt. 13:44.

22 Gr. wat my winste was, dit is, wat ek in daardie tyd vir my nuttig en bevorderlik tot saligheid geag het.

23 Dit is, daarenteen verwerp as iets wat skade veroorsaak.

l Jes. 53:11. Jer. 9:23. Joh. 17:3. Kol. 2:2.

24 Dit is, ek het dit nie slegs so geag toe ek eers tot Christus bekeer was nie, maar ag dit nou nog so, en bly by daardie mening.

25 Naamlik waardeur die mense hul saligheid buite Christus soek.

26 Naamlik nie net van die blote kennis nie, maar van die saligmakende kennis, wat gepaardgaan met vertroue en geloof, Joh. 17:3, soos die woorde my Here ook te kenne gee.

27 Gr. aan alles skade gely het.

28 Die Griekse woord beteken eintlik: dinge wat óf deur die honde uitgewerp, óf vir die honde gegooi word; dit is, vuil en verwerplike dinge.

29 Dit is, om die geregtigheid van Christus deelagtig te word, wat die grootste wins is.

m Rom. 1:17; 3:21.

30 Dit is, in sy gemeenskap, deur die geloof in Hom ingelyf, en sy geregtigheid deelagtig te wees.

31 Naamlik in die oordeel van God.

32 Dit is, nie deur te vertrou op my eie geregtigheid nie.

33 Dit is, wat uit volkome onderhouding van die wet bestaan, sowel die van die sedes as die van die seremonies.

34 Dit is, wat ’n mens verkry as ’n mens in Christus glo en sy geregtigheid daardeur aanneem; en wat aan die gelowiges deur God uit genade as hul geregtigheid toegereken word.

35 Naamlik van Christus.

36 Dit is, wat God ons skenk en genadiglik toereken, Rom. 4:6.

37 Of: in; dit is, wat ons deur die geloof verkry en ons toe-eien, soos deur ’n geestelike instrument waardeur hierdie geregtigheid aangeneem word.

n Rom. 8:17. 2 Kor. 4:10. 2 Tim. 2:11, 12. 1 Petr. 4:13.

38 Hiermee beskryf hy die ware saligmakende en regverdigmakende geloof, waarin dit bestaan, waarop dit wys en wat dit voortbring.

39 Naamlik Christus.

40 Sien vers 8.

41 Dit is, die vrugte en weldade wat Hy deur sy dood vir ons verkry het, deur sy opstanding kragtig toepas en toebring, naamlik ons regverdigmaking voor God, en die krag om uit die dood van die sonde op te staan. Sien Rom. 4:25; 6:3, 4, ens.; 8:11. 1 Petr. 4:1, 2.

42 Dit is, sodat ek deel het aan die vrugte van die lyding van Christus, naamlik dat ek daardeur van die straf van die sondes verlos en tot ’n nuwe lewe opgewek word, en ter wille van Hom alle lyding, kruis en verdrukking, wat my om sy ontwil sou mag oorkom, gewillig verdra.

43 Naamlik die ou mens wat in my gekruisig is, Rom. 6:5, 6, en ter wille van Hom die hele dag sterwende is, Rom. 8:36.

44 Hierdie woorde beteken hier nie enige onsekerheid oor die saak nie, maar dui aan hoe moeilik dit is om dit te verkry, om daarmee die lus en die ywer op te skerp. Dit beteken: met ywer daarna streef of ek miskien, ens.

45 Naamlik die salige opstanding van die regverdiges, en daardeur tot die ewige heerlikheid en geluksaligheid, Luk. 14:14. Joh. 6:39, 40, 44, 54. Daarom word slegs die gelowiges en regverdiges kinders van die opstanding genoem, Luk. 20:36. Nie dat die goddeloses nie ook sal opstaan nie, Dan. 12:2. Hand. 24:15, maar hulle opstanding sal wees tot verdoemenis, Joh. 5:29, en daarom meer ’n val as ’n opstanding.

46 Naamlik die volmaaktheid van die wedergeboorte in hierdie lewe.

47 Naamlik in wedergeboorte.

48 Of: ek vervolg, naamlik met groot lus en ywer.

49 Waarmee hy nie wil sê dat hy onseker is of hy dit sal verkry nie, maar hy verwys na die gewig van die saak en sy ywer daarna, soos in die voorgaande vers.

50 Of: waartoe, dit is, om dit te verkry.

51 Dit is, deur Christus as ’t ware gegryp en gevang, toe ek sy kerk vervolg het, en as ’t ware in die verderf geloop het, op die pad na Damaskus deur Hom aangegryp en tot Hom bekeer is, Handelinge 9. Sien dergelike in 1 Kor. 13:12.

52 Dit is, ek beroem my nie daarop nie, soos sommige dalk mag dink, omdat ek so baie roem oor die gemeenskap met Christus en sy weldade.

o 1 Kor. 9:24. 2 Tim. 4:7.

53 Naamlik as die vernaamste waarin ek my met alle ywer oefen, Ps. 27:4. Luk. 10:42.

54 Dit is, deur nie tevrede te wees met die goeie wat ek voorheen kon gedoen het nie.

55 Dit is, wat verby is, waarmee dit wat hy tot nog toe gedoen het, ook terwyl hy nog tot Christus bekeer is, verstaan word. ’n Beeld geneem van diegene wat in ’n wedloop reeds ver gehardloop het, en die plekke wat verby is agter hulle laat. Sien 1 Kor. 9:24.

56 Naamlik, soos atlete hul kop, nek, arms en liggaam vorentoe uitstrek om des te vinniger te hardloop; deur welke beeld hy sy groot en naarstige poging verklaar, wat hy met alle mag aanwend om dit te verkry.

57 Dit is, wat nog gehardloop moet word om by die einde of wenstreep te kom. Of: na die beloftes van die evangelie, wat aan ons voorgestel is om dit te bekom en te gryp.

58 Of: vervolg; soos in vers 12.

59 Dit is, na die wenstreep wat aan die einde van die wedloop gestel is, waarna die atlete met inspanning hardloop om dit eerste te gryp, en só die prys te wen.

60 Gr. brabeion, waardeur ’n kroon of ander wyse van verering verstaan word wat gegee is aan diegene wat die wedloop gewen het. Die apostel verstaan daardeur die ewige saligheid, wat hy ’n kroon van die geregtigheid noem, 2 Tim. 4:8.

61 Dit is, wat ons deur God uit die hemel gegee word, en ons tot die hemelse geluksaligheid nooi en bring, wat gegee sal word aan diegene wat God kragtig geroep het tot die gemeenskap van die saligheid, wat hierdie roeping gehoorsaam is, en gevolglik hierdie wedloop met volharding tot die einde toe hardloop.

62 Dit is, wat deur die verdienste van Christus alleen verkry kan word, en wat op grond daarvan en deur Hom aan ons gegee word.

63 Deur hierdie woord bedoel die apostel nie diegene wat in die onderhouding van die wet volmaak sou wees nie, want dit het hy tevore van homself ontken, verse 12, 13, maar diegene wat die hoofpunte van die Christelike godsdiens deeglik en grondig verstaan, en daarin reeds as ’t ware ’n volwasse man geword het, Ef. 4:13, teenoor wie diegene gestel word wat nog soos kinders in kennis is. Sien 1 Kor. 2:6; 3:1. Hebr. 5:13, 14.

64 Naamlik soos tevore deur my geleer is; naamlik oor die regverdigmaking van die mens voor God, vers 9, van ons onvolmaaktheid in hierdie lewe, vers 12, en dergelike.

65 Naamlik in sake van minder gewig.

66 Naamlik julle mettertyd in kennis laat toeneem en groei, indien julle leergierig is en die middele daartoe met ywer gebruik. Hy sê dit nie van verborge openbarings buite die Woord van God nie, maar van die gewone openbarings of bekendmakings wat Hy bewerk deur die prediking van sy Woord, vergesel van die verligting van sy Gees. Dit word gesê vernaamlik tot troos van die swakkes, wat nog nie reg kon verstaan dat die seremoniële wet heeltemal afgeskaf was nie; dat God naamlik ook mettertyd sou gee dat hulle dit verstaan. Sien hieroor ook Romeine 14.

p Gal. 6:16.

q Rom. 12:16; 15:5. 1 Kor. 1:10. Filip. 2:2. 1 Petr. 3:8.

67 Dit is, in die leerstukke, wat ons deur die genade van God begryp.

68 Dit is, volgens die kennis wat ons daarvan het uit die Woord van God, wat soos ’n reël of rigsnoer is, waarvolgens ons ons geloof en wandel moet rig.

r 1 Kor. 4:16; 11:1. 1 Thess. 1:6.

s 2 Thess. 3:9. 1 Petr. 5:3.

69 Of: tesame, tegelyk.

70 Naamlik in gesindheid en in lewenswandel. Sien 1 Kor. 11:1.

71 Naamlik soos ek wandel; soos in die volgende verklaar word.

t Rom. 16:17.

72 Naamlik van die leraars, wat die Woord preek, en in hul roeping nie wandel soos ons nie.

73 Naamlik toe ek by julle was, en julle daarteen in my prediking gewaarsku het.

74 Naamlik deur hierdie brief van my.

75 Dit is, met droefheid van die hart, wat daaruit ontstaan dat hierdie leraars met hul valse leer en wanordelike lewe die gemeente verlei en versteur, en hulself die verderf op die hals haal.

76 Dit is, hulle laat blyk dat hulle vyande is van dié leer waarin geleer word dat die mense nie deur die onderhouding van die wet nie, maar deur die enigste offer van Christus wat aan die kruis geskied het, salig word, 1 Kor. 1:23, 24; 2:2.

77 Dit is, wat uiteindelik deur God met die ewige verdoemenis gestraf sal word, Openb. 19:20, 21. Sien ook Filip. 1:28.

78 Dit is, wat in plaas daarvan om God te dien en sy eer te verbrei, niks anders begeer as om ’n lekker en gemaklike lewe te lei nie, en om hul buik, asof dit hul god is, te dien.

79 Dit is, eer wat hulle by die mense soek, en waarop hulle roem.

80 Dit is, soek hul eer in dit wat vir hulle skandelik is, dit is, vir hulle sal uitgroei tot tydelike en ewige skande. Of: tot hul skande.

81 Of: oorweeg, dit is, om met die sintuie en die verstand daarna te streef.

82 Dit is, tydelike genot en gemak.

v Hebr. 13:14.

x 1 Kor. 1:7. 1 Thess. 1:10. Tit. 2:13.

83 Dit is, burgerlike gedrag en lewenswyse van die ware Christene. Sien Filip. 1:27.

84 Dit is, is sodanig dat dit altyd streef nie na aardse nie, maar na hemelse dinge, en na die heerlikheid wat in die hemele weggebêre is. Sien Kol. 3:1, 2.

85 Gr. uit, naamlik plek van die hemele. Sien dergelike in Matt. 2:9.

86 Naamlik om die lewende en die dode te kom oordeel, Hand. 1:11.

y 1 Kor. 15:51. Kol. 3:4. 1 Joh. 3:2.

87 Gr. die liggaam van ons vernedering, of: ons liggaam van vernedering, dit is, hierdie sterflike en verganklike liggaam van ons.

88 Die Griekse woord beteken om van gedaante of hoedanigheid te verander. Sien 1 Kor. 15:52, ens.

89 Naamlik in onverderflikheid, onsterflikheid en ander geestelike eienskappe. Sien 1 Kor. 15:48, 49.

90 Gr. die liggaam van sy heerlikheid, of: sy liggaam van heerlikheid, naamlik wat Hy ná sy opstanding, en nou nog in die hemel het.

91 Dit is, volgens sy goddelike en alvermoënde krag, waardeur Hy alles vermag, en derhalwe ook die opwekking en verandering van ons liggame teweeg kan bring.