Die owerpriesters hou raad.

(Matt. 26:1-5 en ooreenk. pl.)

EN^a die ¹pasga en die fees ²van die ongesuurde brode sou oor twee dae wees; en die owerpriesters en die skrifgeleerdes het gesoek hoe hulle Hom met lis gevange kon neem en doodmaak.

Maar hulle het gesê: Nie op die fees nie, sodat daar nie miskien ’n oproer ³onder die volk kom nie.

Die maaltyd in Betánië.

(Matt. 26:6-13 en ooreenk. pl.)

^bEN toe Hy in Betánië was, in die huis van Simon, die melaatse, terwyl Hy aan tafel was, kom daar ⁴’n vrou met ’n albaste fles met ⁵egte, baie kosbare nardussalf; en sy breek die albaste fles en gooi dit op sy hoof uit.

En daar was ⁶sommige wat by hulleself verontwaardig was en gesê het: Waarvoor het hierdie verkwisting van die salf plaasgevind?

Want dit kon vir meer as driehonderd ⁷pennings verkoop en die geld aan die armes gegee geword het. En hulle het teen haar ⁸uitgevaar.

Maar Jesus sê: Laat haar staan; waarom val julle haar lastig? Sy het ’n goeie werk aan My gedoen.

^cWant die armes het julle altyd by julle, en wanneer julle wil, kan julle aan hulle goed doen; maar My het julle nie altyd nie.

⁹Wat sy kon, het sy gedoen. Sy het vooruit al my liggaam vir die begrafnis ¹⁰gesalf.

Voorwaar Ek sê vir julle, oral waar ¹¹hierdie evangelie oor die hele wêreld verkondig word, daar sal ook gespreek word van wat sy gedoen het, tot ’n gedagtenis aan haar.

Die loon van die verraad.

(Matt. 26:14-16 en ooreenk. pl.)

^dEN Judas Iskáriot, een van die twaalf, het na die owerpriesters gegaan om Hom aan hulle oor te lewer.

En toe hulle dit hoor, was hulle bly en het belowe om hom ¹²geld te gee. En hy het na ¹³’n goeie geleentheid gesoek om Hom oor te lewer.

Die laaste pasga. Die heilige nagmaal.

(Matt. 26:17-30 en ooreenk. pl.)

^eEN op die eerste dag ^fvan die ongesuurde brode, ¹⁴wanneer hulle gewoonlik die pasga geslag het, sê sy dissipels vir Hom: Waar wil U hê moet ons gaan klaarmaak, dat U ¹⁵die pasga kan eet?

En Hy stuur twee van sy dissipels en sê vir hulle: Gaan na die ¹⁶stad toe; en ’n man wat ¹⁷’n kruik water dra, sal julle tegemoetkom. Volg hom,

en waar hy ook mag ingaan, moet julle vir die ¹⁸eienaar van die huis sê: Die Meester laat weet: Waar is die ¹⁹kamer waar Ek met my dissipels die pasga kan eet?

En hy sal julle ’n groot bovertrek wys, ²⁰in gereedheid gebring. Daar moet julle vir ons klaarmaak.

En sy dissipels het gegaan en in die stad gekom en dit gevind soos Hy vir hulle gesê het; en hulle het die pasga toeberei.

^gEn toe dit aand geword het, kom Hy met die twaalf.

En terwyl hulle aan tafel was en eet, sê Jesus: Voorwaar Ek sê vir julle, ^heen van julle sal My verraai, een wat saam met My eet.

Toe het hulle begin om bedroef te word en een vir een aan Hom te sê: Is dit miskien Ek? En ’n ander een: Is dit miskien ek?

En Hy antwoord en sê vir hulle: ²¹Dit is een van die twaalf wat saam met My sy hand in die skottel insteek.

Die Seun van die mens gaan wel heen soos daar van Hom geskrywe is; maar wee daardie man deur wie die Seun van die mens verraai word! Dit sou vir hom goed gewees het as daardie man nie gebore was nie.

ⁱEn terwyl hulle eet, neem Jesus brood, en nadat Hy ²²gedank het, breek Hy dit en gee dit aan hulle en sê: Neem, eet, ²³dit is my liggaam.

Toe neem Hy die beker, en nadat Hy ²⁴gedank het, gee Hy dit aan hulle, en ²⁵hulle het almal daaruit gedrink.

En Hy sê vir hulle: Dit is my bloed, die bloed van die nuwe testament, wat vir baie uitgestort word.

Voorwaar Ek sê vir julle, Ek sal nooit meer van die vrug van die wynstok drink nie, tot op daardie dag wanneer Ek dit nuut sal drink in die koninkryk van God.

En toe hulle die lofsang gesing het, het hulle uitgegaan na die Olyfberg.

Petrus gewaarsku.

(Matt. 26:31-35 en ooreenk. pl.)

^kTOE sê Jesus vir hulle: Julle sal almal in hierdie nag ²⁶aanstoot neem aan My; want daar is geskrywe: ^lEk sal die herder slaan, en die skape sal verstrooi word.

^mMaar nadat Ek opgestaan het, sal Ek voor julle uit na Galiléa gaan.

En Petrus sê vir Hom: Al sal almal ook ²⁷aanstoot neem, dan tog nie ek nie.

ⁿDaarop sê Jesus vir hom: Voorwaar Ek sê vir jou, vandag, in hierdie nag, voordat die haan ²⁸twee maal gekraai het, sal jy My drie maal verloën.

^oMaar hy het nog baie meer aangehou en gesê: Al moes ek saam met U sterwe, ek sal U nooit verloën nie! En net so het almal ook gesê.

Jesus in Getsémané.

(Matt. 26:36-46 en ooreenk. pl.)

^pTOE kom hulle in ’n ²⁹plek waarvan die naam Getsémané was. En Hy sê vir sy dissipels: Sit hier onderwyl Ek gaan bid.

En Hy neem Petrus en Jakobus en Johannes saam met Hom en begin ontsteld en benoud te word.

En Hy sê vir hulle: ^qMy siel is ³⁰diep bedroef tot die dood toe; bly hier en waak.

^rEn toe Hy ’n bietjie verder gegaan het, val Hy op die grond en bid dat, as dit moontlik was, ³¹dié uur by Hom sou verbygaan.

En Hy sê: ³²Abba, Vader, alle dinge is vir U moontlik; neem hierdie beker van My weg; ^snogtans nie wat Ek wil nie, maar wat U wil.

^tEn Hy kom en vind hulle aan die slaap en sê vir Petrus: Simon, slaap jy? Was jy nie in staat om een uur te waak nie?

Waak en bid, dat julle nie in versoeking kom nie. ^vDie gees is wel gewillig, maar die vlees is swak.

Hy gaan toe weer weg en bid dieselfde ³³woorde.

En toe Hy terugkom, vind Hy hulle weer aan die slaap, want hulle oë was swaar; en hulle het nie geweet wat om Hom te antwoord nie.

En Hy kom vir die derde keer en sê aan hulle: ³⁴Slaap maar voort en rus. Dit is genoeg; die uur het gekom. Kyk, die Seun van die mens word oorgelewer in die hande ³⁵van die sondaars.

Staan op, laat ons gaan; kyk, hy is naby wat My verraai.

Jesus word gevange geneem.

(Matt. 26:47-56 en ooreenk. pl.)

^xEN dadelik, terwyl Hy nog spreek, verskyn Judas wat een van die twaalf was, en saam met hom ’n groot menigte met swaarde en ³⁶stokke, gestuur deur die owerpriesters en die skrifgeleerdes en die ouderlinge.

En sy verraaier het ’n teken met hulle afgespreek en gesê: Die een wat ek sal soen — dit is Hy; gryp Hom en neem Hom met sekerheid weg.

En toe hy kom, gaan hy dadelik na Hom en sê: Rabbi, Rabbi! en ^ysoen Hom.

Daarop slaan hulle hul hande aan Hom en gryp Hom.

En ³⁷een van die wat daar gestaan het, het sy swaard uitgetrek en die dienskneg van die hoëpriester geslaan en sy oor afgekap.

En Jesus antwoord en sê vir hulle: ³⁸Het julle soos teen ’n rower uitgetrek met swaarde en stokke om My gevange te neem?

Dag vir dag was Ek by julle in die tempel besig om te leer, en julle het My nie gegryp nie. ^zMaar die Skrifte moes vervul word.

^aToe het ³⁹almal Hom verlaat en gevlug.

En ’n sekere jongman ⁴⁰met ’n linnedoek om sy naakte lyf het Hom gevolg; en ⁴¹die jongmanne het hom gegryp;

maar hy het die linnedoek laat staan en naak van hulle weggevlug.

Jesus voor die Joodse Raad.

(Matt. 26:57-68 en ooreenk. pl.)

^bEN hulle het Jesus weggelei na ⁴²die hoëpriester. En al die owerpriesters en die ouderlinge en die skrifgeleerdes het by hom vergader.

En Petrus het Hom van ver af gevolg tot binne-in die paleis van die hoëpriester, en het saam met die dienaars gesit en hom ⁴³by die vuur warm gemaak.

^cEn die owerpriesters en die hele ⁴⁴Raad het getuienis teen Jesus gesoek om Hom dood te maak, en hulle het niks gevind nie;

want baie het vals teen Hom getuig en die getuienisse ⁴⁵was nie eenders nie.

En ⁴⁶sommige het opgestaan en vals teen Hom getuig en gesê:

Ons het Hom hoor sê: ^dEk sal hierdie tempel wat met hande gemaak is, afbreek en in drie dae ’n ander een opbou wat nie met hande gemaak is nie.

En selfs so was hulle getuienis nie eenders nie.

^eToe staan die hoëpriester in hul midde op en vra Jesus en sê: Antwoord U niks nie? Wat getuig hierdie manne teen U?

^fMaar Hy het stilgebly en geen antwoord gegee nie. Weer stel die hoëpriester Hom die vraag en sê vir Hom: Is U die Christus, die Seun van die geseënde God?

En Jesus sê: Ek is. ^gEn u almal sal die Seun van die mens ⁴⁷aan die regterhand van die krag van God sien sit en kom ⁴⁸met die wolke van die hemel.

Toe skeur die hoëpriester sy ⁴⁹klere en sê: Wat het ons nog getuies nodig!

Julle het die godslastering gehoor; wat dink julle? En hulle het almal Hom veroordeel dat Hy die dood skuldig was.

En sommige het begin om op Hom te spuug en sy aangesig toe te maak en Hom ^hmet die vuis te slaan en vir Hom te sê: Profeteer! En die dienaars het Hom ⁵⁰met stokke geslaan.

Jesus deur Petrus verloën.

(Matt. 26:69-75 en ooreenk. pl.)

ⁱEN terwyl Petrus onder in die binneplaas was, kom daar een van die diensmeisies van die hoëpriester,

en toe sy Petrus sien, besig om hom warm te maak, kyk sy na hom en sê: Jy was ook ⁵¹by die Nasaréner, Jesus.

Maar hy het dit ontken en gesê: Ek weet nie en begryp nie wat jy sê nie. En hy het buite na die ⁵²voorplein gegaan; en die haan ⁵³het gekraai.

^kEn toe die diensmeisie hom weer sien, begin sy aan die wat daar staan, te sê: Hierdie man behoort by hulle.

Maar hy het dit weer ontken. En ⁵⁴’n bietjie later weer sê die ⁵⁵wat daar staan vir Petrus: Waarlik, jy behoort by hulle, want jy is ook ’n Galiléër en jou spraak ⁵⁶is net so.

Toe begin hy homself te verwens en te sweer: Ek ken nie daardie man van wie julle praat nie.

En vir die tweede keer het die haan gekraai; en Petrus het die woord onthou wat Jesus vir hom gesê het: ^lVoor die haan twee maal gekraai het, sal jy My drie maal verloën. ⁵⁷En hy het in trane uitgebars.