Bergpredikasie (einde). Die oordeel uit die hoogte. Die heilige vir die honde gegee. Die aanhoudende gebed. Die nou en die wye poort. Valse profete. Hoor en doen.

MOENIE^{a 1}oordeel nie, sodat julle nie geoordeel word nie.

^bWant met die oordeel waarmee julle oordeel, sal julle geoordeel word; en met die maat waarmee julle meet, sal weer vir julle gemeet word.

^cEn waarom sien jy die ²splinter in die oog van jou broeder, maar die balk in jou eie oog merk jy nie op nie?

Of hoe sal jy vir jou broeder sê: Laat my toe om die splinter uit jou oog uit te haal, en kyk, in jou eie oog is die balk!

^dGeveinsde, haal eers die balk uit jou oog uit, en dan sal jy goed sien om die splinter uit die oog van jou broeder uit te haal.

^eMoenie wat ³heilig is, aan die honde gee nie; en gooi julle pêrels nie voor die varke nie, sodat hulle dit nie miskien met hulle pote vertrap en omdraai en julle verskeur nie.

⁴Bid, ^fen vir julle sal gegee word; soek, en julle sal vind; klop, en vir julle sal oopgemaak word.

^gWant elkeen wat ⁵bid, ontvang; en hy wat soek, vind; en vir hom wat klop, sal oopgemaak word.

Of watter mens is daar onder julle wat, as sy seun hom brood vra, aan hom ’n klip sal gee;

en as hy ’n vis vra, aan hom ’n slang sal gee?

As julle ^hwat sleg is, dan weet om goeie gawes aan julle kinders te gee, hoeveel te meer sal julle Vader wat in die hemele is, goeie dinge gee aan die wat Hom bid!

ⁱAlles wat julle dan wil hê dat die mense aan julle moet doen, net so moet julle aan hulle ook doen; want dit is ⁶die wet en die profete.

^kGaan in deur die nou poort, want breed is die poort en wyd is die pad wat na die verderf lei, en daar is baie wat daardeur ingaan.

^lWant die poort is nou en die pad ⁷is smal wat na die lewe lei, en daar is min wat dit vind.

^mMaar pas op vir die valse profete wat in ⁸skaapsklere na julle kom en van binne roofsugtige ⁹wolwe is.

Aan hulle ¹⁰vrugte sal julle hulle ken. ’n Mens pluk tog nie druiwe van dorings of vye van distels nie!

ⁿSo dra elke goeie boom goeie vrugte; maar ¹¹’n slegte boom dra slegte vrugte.

’n Goeie boom kan geen slegte vrugte dra nie, en ’n slegte boom ook geen goeie vrugte nie.

Elke boom wat nie goeie vrugte dra nie, word uitgekap en in die vuur gegooi.

So sal julle hulle dan aan hul vrugte ken.

^oNie elkeen ¹²wat vir My sê: Here, Here! sal ingaan in die koninkryk van die hemele nie, maar hy ¹³wat die wil doen van my Vader wat in die hemele is.

^pBaie sal ¹⁴in daardie dag vir My sê: Here, Here, het ons nie ¹⁵in u Naam geprofeteer en in u Naam duiwels uitgedrywe en in u Naam baie ¹⁶kragte gedoen nie?

^qEn dan sal Ek aan hulle ¹⁷sê: Ek het julle nooit ¹⁸geken nie. ^rGaan weg van My, julle wat die ongeregtigheid werk!

^sElkeen dan wat na hierdie woorde van My luister en dit doen, hom sal Ek vergelyk met ’n verstandige man wat sy huis op die rots gebou het.

En die ¹⁹reën het geval en die waterstrome het gekom en die winde het gewaai en teen daardie huis aangestorm, en dit het nie geval nie, want sy fondament was ²⁰op die rots.

^tEn elkeen wat na hierdie woorde van My luister en dit nie doen nie, sal vergelyk word met ’n dwase man wat sy huis op die ²¹sand gebou het.

En die reën het geval en die waterstrome het gekom en die winde het gewaai en teen daardie huis aangestorm en dit het geval, en sy val was groot.

En toe Jesus hierdie woorde geëindig het, was die skare ²²verslae oor sy leer;

^vwant Hy het hulle geleer soos een wat ²³gesag het, en nie soos die skrifgeleerdes nie.