Gifte vir die tabernakel.

TOE^a het Moses die hele vergadering van die kinders van Israel bymekaar laat kom en aan hulle gesê: Dit is ¹die woorde wat die HERE beveel het, om dit te doen:

^bSes dae lank kan daar werk verrig word, maar op die sewende dag moet daar vir julle ²’n heiligheid, ’n dag van volkome rus wees tot eer van die HERE. Elkeen wat daarop werk verrig, moet gedood word.

^cJulle mag op die sabbat ³geen vuur aansteek in ⁴enigeen van julle woonplekke nie.

Verder het Moses die hele vergadering van die kinders van Israel toegespreek en gesê: Dít is die saak wat die HERE beveel het:

^dNeem van julle ⁵besittings ’n offergawe aan die HERE. Laat elkeen wat ⁶gewillig is in sy hart, dit bring, die offergawe van die HERE: goud en silwer en koper;

^een pers en purperrooi en bloedrooi stowwe en fyn linne en bokhaar;

^fen rooigeverfde ramsvelle en robbevelle en akasiahout;

^gen olie vir die kandelaar en speserye vir die salfolie en vir die reukwerk van speserye;

^hen oniksstene en stene om in te lê, vir die skouerkleed en die borstas.

En almal wat kunsvaardig is onder julle, moet kom en alles maak wat die HERE beveel het:

ⁱdie tabernakel, sy tent en sy dekkleed, sy hakies en sy style, sy dwarshoute, sy pilare en sy voetstukke;

die ark en sy ⁷draaghoute, die versoendeksel en die voorhangsel tot bedekking;

die ^ktafel met sy draaghoute en al sy gereedskap, en ⁸die ^ltoonbrode;

en die kandelaar ⁹tot verligting, met sy gereedskap en sy lampe, en die olie vir die kandelaar;

^men die ¹⁰reukaltaar met sy draaghoute, en ⁿdie salfolie en die reukwerk van speserye, en ^odie bedekking vir die ingang van die tabernakel;

^pdie brandofferaltaar met sy traliewerk van koper, sy draaghoute en al sy gereedskap; ^qdie waskom met sy voetstuk;

^rdie behangsels van die voorhof, sy pilare en sy voetstukke, en ^sdie bedekking van die poort van die voorhof;

^tdie ¹¹penne van die tabernakel en die penne van die voorhof met hulle ¹²lyne;

die kunstige klere om in die heiligdom te dien, die heilige klere vir die priester Aäron en die klere van sy ^vseuns om ¹³die priesteramp te bedien.

Toe het die hele vergadering van die kinders van Israel van Moses af weggegaan.

En elkeen wie se hart hom ¹⁴opgewek en elkeen wie se gees hom aangedryf het, het gekom: hulle het die offergawe van die HERE gebring vir die werk aan die tent van samekoms en vir sy hele bediening en vir ¹⁵die heilige klere;

die manne het met die vroue gekom, elkeen wat gewillig van hart was; hulle het gespes en ringe en vingerringe en halssierade, allerhande goue goed, gebring. En elkeen wat ’n offer van goud aan die HERE ¹⁶gewy het,

en elkeen wat in ¹⁷besit was van pers en purperrooi en bloedrooi stowwe en fyn linne en bokhaar en rooigeverfde ramsvelle en robbevelle, het dit gebring.

Elkeen wat ’n offergawe van silwer of koper kon aanbied, het die offergawe van die HERE gebring; en elkeen wat akasiahout besit het, wat oral by die ¹⁸werk kon gebruik word, het dit gebring.

En ^xelke vrou wat kunsvaardig was, het ¹⁹met haar eie hande gespin en die spinsel gebring: die pers en purperrooi en bloedrooi stowwe en die fyn linne.

En al die vroue wie se hart hulle opgewek het deur kunsvaardigheid, het die bokhaar gespin.

En die owerstes het die oniksstene gebring en die stene om in te lê, vir die skouerkleed en die borstas,

en die speserye en die olie ^yvir die kandelaar en vir die salfolie en ^zvir die reukwerk van speserye.

Elke man en vrou wie se hart hulle aangedryf het om iets by te dra vir al die werk wat die HERE deur ²⁰die diens van Moses beveel het om te verrig — as vrywillige offergawe aan die HERE het die kinders van Israel dit gebring.

Daarop het Moses aan die kinders van Israel gesê: Kyk, ^adie HERE het Besáleël, die seun van Uri, die seun van Hur, van die stam van Juda, ^bby sy naam geroep;

en Hy het hom met die Gees van God vervul, met wysheid, met verstand en met kennis en bekwaamheid vir allerhande werk;

en ^com kunstige planne uit te dink, om dié uit te voer in goud en silwer en koper,

en ^ddeur snywerk in stene wat ingelê moet word, en deur houtsnywerk — om werksaam te wees in allerhande kunsarbeid.

Hy het dit ook in sy hart gegee om ander te onderrig, aan hom en aan Ohóliab, die seun van Ahísamag, van die stam van Dan.

^eHy het hulle vervul met kunsvaardigheid om allerhande werk te maak van ’n ambagsman en ’n kunstenaar en van ’n bewerker van veelkleurige goed in pers en purperrooi en bloedrooi stowwe en fyn linne, en van ’n wewer — hulle wat al die werk moes verrig en kunstige planne moes uitdink.