SO moet dan Besáleël en Ohóliab en elkeen wat kunsvaardig is, in wie die HERE wysheid en verstand gegee het om met kennis al die werk tot vervaardiging van die heiligdom te verrig, dit maak net soos die HERE beveel het.

En Moses het Besáleël en Ohóliab geroep en elkeen wat kunsvaardig was, in wie se hart die HERE wysheid gegee het; elkeen wie se hart hom opgewek het om aan die werk te gaan om dit klaar te maak.

En hulle het voor die oë van Moses ontvang al die ¹offergawes wat die kinders van Israel vir die verrigting van die werk by die vervaardiging van die heiligdom gebring het. Maar húlle het vir hom nog ²elke môre vrywillige offergawes gebring.

Toe het al die kunsvaardige manne wat met al die werk by die heiligdom besig was, ³man vir man, van die werk af gekom waar hulle mee besig was,

en hulle het met Moses gespreek en gesê: ⁴Die volk bring meer as wat nodig is vir die uitvoering van die werk waarvan die HERE die vervaardiging beveel het.

Daarop het Moses bevel gegee, en hulle het ⁵’n oproep deur die laer laat gaan en gesê: Laat geen man of vrou verder enige werksaamheid ⁶verrig in verband met die offergawe vir die heiligdom nie. Toe het die volk opgehou om te bring;

want ⁷die boustof was vir ⁸hulle genoeg om die hele werk tot stand te bring; ja, daar het oorgebly.

Samestelling van die tabernakel.

SO het dan almal wat kunsvaardig was onder die werksmense, die ⁹tabernakel uit tien tentdoeke vervaardig; uit fyn dubbeldraad-linne en pers en purperrooi en bloedrooi stowwe, met gérubs; as kunstige werk het hy dit gemaak.

^aDie lengte van elke tentdoek was agt-en-twintig el en die breedte van elke tentdoek vier el. Al die tentdoeke het ¹⁰een maat gehad.

En hy het vyf van die tentdoeke aanmekaargewerk, die een aan die ander; en weer vyf tentdoeke het hy aanmekaargewerk, die een aan die ander.

^bEn hy het lissies van pers stof gemaak aan die soom van die buitenste tentdoek van die een stel; so het hy dit gemaak aan die soom van die laaste tentdoek van die tweede stel.

^cVyftig lissies het hy gemaak aan die een tentdoek, en vyftig lissies het hy gemaak aan die rand van die tentdoek wat aan die tweede stel behoort het. ^dDie lissies was die een teenoor die ander.

^eHy het ook vyftig goue hakies gemaak en die tentdoeke saamgevoeg, die een aan die ander, met die hakies, sodat die tabernakel een geheel was.

Verder het hy doeke van bokhaar gemaak as ¹¹’n tentseil oor die tabernakel: elf tentdoeke het hy dit gemaak.

Die lengte van elke tentdoek was dertig el, en die breedte van elke tentdoek vier el: die elf tentdoeke het een maat gehad.

En hy het vyf van die tentdoeke besonders aanmekaargewerk en ses van die tentdoeke besonders.

En hy het vyftig lissies gemaak aan die soom van die laaste tentdoek van die een stel, en vyftig lissies het hy gemaak aan die soom van die laaste tentdoek van die tweede stel.

^fHy het ook vyftig koperhakies gemaak om die tent saam te voeg, sodat dit een geheel was.

^gOok het hy vir die tent ’n dekkleed van rooigeverfde ramsvelle gemaak en daar bo-oor ’n dekkleed van robbevelle.

^hHy het ook vir die tabernakel die regopstaande style van akasiahout gemaak.

ⁱDie lengte van die styl was tien el, en anderhalf el die breedte van elke styl.

^kElke styl het twee ¹²tappe gehad wat met mekaar verbind was. So het hy dit gemaak vir al die style van die tabernakel.

^lEn hy het die style vir die tabernakel gemaak: twintig style aan die suidekant, na die suide toe.

^mEn hy het veertig silwervoetstukke onder die twintig style gemaak: twee voetstukke onder die een styl vir sy twee tappe en twee voetstukke onder die ander styl vir sy twee tappe.

ⁿHy het ook vir die ander sykant van die tabernakel, aan die noordekant, twintig style gemaak

^omet hulle veertig silwervoetstukke: twee voetstukke onder die een styl en twee voetstukke onder die ander styl.

^pEn vir die agterkant van die tabernakel, teen die weste, het hy ses style gemaak.

^qOok het hy twee style vir die hoeke van die tabernakel aan die agterkant gemaak.

^rEn hulle was dubbel van onder, en net so was hulle bo dubbel tot by die eerste ring. So het hy dit gemaak vir altwee, vir die twee hoeke.

^sSo was daar dan agt style met hulle silwervoetstukke: sestien voetstukke; ¹³twee voetstukke onder elke styl.

^tHy het ook dwarshoute van akasiahout gemaak: vyf vir die style van die een sykant van die tabernakel

^ven vyf dwarshoute vir die style van die ander sykant van die tabernakel; ook vyf dwarshoute vir die style van die agterkant van die tabernakel teen die weste.

^xEn hy het die middelste dwarshout gemaak om oordwars te loop, in die middel van die style, van die een ent na die ander.

^yEn hy het die style met goud oorgetrek; en hulle ringe, as plekke vir die dwarshoute, het hy van goud gemaak. Die dwarshoute het hy ook met goud oorgetrek.

Verder het hy ¹⁴die voorhangsel ^zgemaak van pers en purperrooi en bloedrooi stowwe en fyn dubbeldraad-linne; as kunstige werk het hy dit gemaak, met gérubs.

^aEn hy het vier pilare van akasiahout daarvoor gemaak en dit met goud oorgetrek; hulle kramme was ook van goud; en hy het daarvoor vier silwervoetstukke gegiet.

^bHy het ook vir die ingang van die tent ¹⁵’n bedekking gemaak van pers en purperrooi en bloedrooi stowwe en fyn dubbeldraad-linne, veelkleurige werk;

^cen die vyf pilare wat daarby behoort, met hulle kramme; en hy het hulle toppe en ringe met goud oorgetrek; en hulle vyf voetstukke was van koper.