Wette oor die reiniging van ’n melaatse.

VERDER het die HERE met Moses gespreek en gesê:

Dit is die wet van die melaatse ¹op die dag van sy reiniging. ^aHy moet ²na die priester gebring word,

en die priester moet buitekant die laer gaan. As die priester ³sien dat die plaag van melaatsheid genees is, van die melaatse weg is,

moet die priester bevel gee dat hulle vir hom wat gereinig moet word, twee lewendige rein ⁴voëls en sederhout en ⁵skarlakendraad en ⁶hisop moet bring.

Die priester moet ook bevel gee dat hulle die een voël in ’n ⁷erdepot oor ⁸vars water slag.

Die lewendige voël moet hy neem, sowel as die sederhout en die skarlakendraad en die hisop, en dié en die lewendige voël insteek in die bloed van die voël wat oor die vars water geslag is.

En hy moet op hom wat van die melaatsheid gereinig moet word, sewe maal sprinkel en hom reinig, en die lewendige voël moet hy oor die ⁹oop veld laat wegvlieg.

Dan moet hy wat gereinig moet word, sy klere was en al sy hare afskeer en ’n bad neem; dan sal hy rein wees. En daarna kan hy in die laer kom, ¹⁰maar hy moet sewe dae lank buitekant sy tent bly.

En op die sewende dag moet hy al sy hare afskeer, sy hoof en sy baard en sy winkbroue — al sy hare moet hy afskeer; en hy moet sy klere was en sy liggaam in die water bad. Dan sal hy rein wees.

En op die agtste dag moet hy twee ¹¹lammers sonder gebrek neem en een ¹²jaaroud ooilam sonder gebrek en ¹³drie-tiendes van ’n efa fynmeel as spysoffer, met olie gemeng, en een ¹⁴log olie.

En die priester wat die reiniging bewerk, moet die man wat gereinig word, en dié gawes voor die aangesig van die HERE by die ingang van die tent van samekoms stel.

En die priester moet die een lam neem en dit saam met die log olie as skuldoffer aanbring ^ben dit as ¹⁵beweegoffer voor die aangesig van die HERE beweeg.

Dan moet hy die lam slag op die plek waar hulle die sondoffer en die brandoffer slag, in die ¹⁶heilige plek; want die skuldoffer ^cnet soos die sondoffer behoort aan die priester; ¹⁷hoogheilig is dit.

En die priester moet van die bloed van die skuldoffer neem, en die priester moet dit stryk aan die regteroorlel van hom wat gereinig word, en aan die duim van sy regterhand en aan die groottoon van sy regtervoet.

Die priester moet ook van die log olie neem en ¹⁸dit giet in die priester se linkerhand.

Dan moet die priester sy regtervinger in die olie steek wat in sy linkerhand is, en met sy vinger van die olie sewe maal sprinkel voor die aangesig van die HERE.

En van die orige olie wat in sy hand is, moet die priester stryk aan die regteroorlel van hom wat gereinig word, en aan die duim van sy regterhand en aan die groottoon van sy regtervoet, ¹⁹bo oor die bloed van die skuldoffer.

Wat dan oor is van die olie wat in die priester se hand is, moet hy stryk op die hoof van hom wat gereinig word. So moet die priester dan vir hom versoening doen voor die aangesig van die HERE.

Die priester moet ook die sondoffer berei en vir hom wat gereinig word, versoening doen weens sy onreinheid; en daarna moet hy die ²⁰brandoffer slag.

En die priester moet die brandoffer en die spysoffer op die altaar ²¹offer. So moet die priester dan vir hom versoening doen, en hy sal rein wees.

Maar as hy arm is ²²en dit nie kan bekostig nie, moet hy een lam as skuldoffer neem om beweeg te word, om vir hom versoening te doen; daarby een tiende van ’n efa fynmeel met olie gemeng as spysoffer, en ’n log olie;

ook twee tortelduiwe of twee ²³jong duiwe — wat hy kan bekostig; en die een sal wees ’n sondoffer en die ander ’n brandoffer.

Hy moet hulle dan op die agtste dag ²⁴ná sy reiniging na die priester bring by die ingang van die tent van samekoms voor die aangesig van die HERE.

En die priester moet die skuldofferlam en die log olie neem; en die priester moet dit as beweegoffer voor die aangesig van die HERE beweeg.

Dan moet hy die skuldofferlam slag, en die priester moet van die bloed van die skuldoffer neem en dit stryk aan die regteroorlel van hom wat gereinig word, en aan die duim van sy regterhand en aan die groottoon van sy regtervoet.

Ook moet die priester van die olie in ²⁵die priester se linkerhand giet.

Dan moet die priester met sy regtervinger van die olie wat in sy linkerhand is, sewe maal sprinkel voor die aangesig van die HERE.

En die priester moet van die olie wat in sy hand is, stryk aan die regteroorlel van hom wat gereinig word, en aan die duim van sy regterhand en aan die groottoon van sy regtervoet, bo oor die plek van die bloed van die skuldoffer.

Wat dan oor is van die olie wat in die priester se hand is, moet hy stryk op die hoof van hom wat gereinig word, om versoening vir hom te doen voor die aangesig van die HERE.

Dan moet hy een van die tortelduiwe berei of van die jong duiwe wat hy kan bekostig —

die een as sondoffer en die ander as brandoffer, saam met die spysoffer. So moet die priester dan vir hom wat gereinig word, versoening doen voor die aangesig van die HERE.

Dit is die wet vir hom op wie die plaag van melaatsheid was, wat by sy reiniging ²⁶nie vermoënd is nie.

Melaatsheid van huise.

VERDER het die HERE met Moses en Aäron gespreek en gesê:

As julle in die land Kanaän inkom wat Ek julle as besitting ²⁷gee, en Ek die plaag van melaatsheid in ’n huis van die land van julle besitting laat kom,

moet hy aan wie die huis behoort, kom en aan die priester te kenne gee en sê: ²⁸Dit lyk my of daar ’n plaag in die huis is.

En die priester moet bevel gee ²⁹dat hulle die huis ³⁰ontruim, voordat die priester die plaag kom bekyk, sodat alles wat in die huis is, nie onrein word nie; en daarna moet die priester kom om die huis te bekyk.

As hy die plaag bekyk en sien dat die plaag aan die mure van die huis is soos liggroen of rooierige kuiltjies, en hulle dieper lyk as die muur,

dan moet die priester uit die huis uitgaan na die deur van die huis en die huis sewe dae lank toesluit.

Op die sewende dag moet die priester dan terugkom; sien hy dan dat die plaag hom uitgebrei het aan die mure van die huis,

dan moet die priester bevel gee dat hulle die klippe uitbreek waaraan die plaag is, en dit buitekant die stad op ’n onrein plek gooi.

En die huis moet hulle binnekant rondom afkrap en die klei wat hulle afgekrap het, buitekant die stad op ’n onrein plek weggooi.

Dan moet hulle ander klippe neem en in die plek van daardie klippe insit, en hulle moet ander klei neem en die huis pleister.

Maar as die plaag weer in die huis uitbreek nadat hulle die klippe uitgebreek en die huis afgekrap het en dit gepleister is,

moet die priester kom; en as hy sien dat die plaag in die huis versprei het, dan is dit ’n ³¹kwaadaardige melaatsheid in die huis; dit is onrein.

Daarom moet hulle die huis afbreek: sy klippe en sy hout en al die klei van die huis, en hulle moet dit buitekant die stad op ’n onrein plek uitbring.

En hy wat in die huis kom, al die tyd dat hulle dit toegesluit hou, sal tot die aand toe onrein wees.

En hy wat in die huis ³²slaap, moet sy klere was; en hy wat in die huis eet, moet sy klere was.

Maar as die priester ³³kom en sien dat die plaag nie in die huis versprei het nadat die huis gepleister is nie, dan moet die priester die huis rein verklaar, want die aangetaste plek het gesond geword.

Dan moet hy om die huis te ³⁴ontsondig twee voëls neem en sederhout en ³⁵skarlakendraad en hisop,

en die een voël in ’n erdepot ³⁶oor vars water slag.

Dan moet hy die sederhout en die hisop en die skarlakendraad en die lewendige voël neem en dit in die bloed van die geslagte voël en in die vars water insteek; en hy moet die huis sewe maal besprinkel.

So moet hy dan die huis ontsondig met die bloed van die voël sowel as met die vars water en die lewendige voël en die sederhout en die hisop en die skarlakendraad.

Daarop moet hy die lewendige voël buitekant die stad ³⁷oor die oop veld laat wegvlieg. So moet hy dan ³⁸vir die huis versoening doen, en dit sal rein wees.

Dit is die wet oor elke plaag van melaatsheid en oor skurfte

en oor melaatsheid van klere en huise

en oor swelsels en uitslag en ligte vlekke,

³⁹om te onderrig wanneer iets onrein en wanneer iets rein is. Dit is die wet oor die melaatsheid.