Efésiërs 1

Opskrif en seëngroet.

PAULUS,¹ ’n apostel van Jesus Christus deur die wil van God, aan ^2adie heiliges wat in Éfese is, en die gelowiges in Christus Jesus:

^bGenade vir julle en vrede van God, onse Vader, en die Here Jesus Christus!

Die seëninge van God in Jesus Christus, Bewerker van ons verlossing en Hoof van die gemeente.

³GESEËND is ^cdie God ⁴en Vader van onse Here Jesus Christus wat ons geseën het met ⁵alle geestelike seëninge ⁶in die hemele ⁷in Christus,

^dsoos Hy ons ⁸in Hom ⁹uitverkies het ¹⁰voor die grondlegging van die wêreld ^eom ¹¹heilig en ¹²sonder gebrek voor Hom ¹³in liefde te wees,

deurdat Hy ons ¹⁴voorbeskik het om ons as sy kinders ¹⁵vir Homself aan te neem deur Jesus Christus, ¹⁶na die welbehae van sy wil,

¹⁷tot lof van die heerlikheid van sy genade waarmee Hy ons ¹⁸begenadig het ^fin die ¹⁹Geliefde.

^g20In Hom het ons ²¹die verlossing ²²deur sy bloed, ²³die vergifnis van die misdade na ²⁴die rykdom van sy genade,

wat Hy ²⁵oorvloedig aan ons bewys het ²⁶in alle wysheid en ²⁷verstand,

deurdat Hy aan ons ^h28die verborgenheid van sy wil bekend gemaak het na sy welbehae wat Hy in Homself ²⁹voorgeneem het,

³⁰om die ⁱvolheid van ³¹die tye te reël, met die doel om alle dinge ³²wat in die hemele sowel as wat op die aarde is, ³³onder een hoof in Christus te verenig —

³⁴in Hom in wie ³⁵ons ook ^k’n ³⁶erfdeel ontvang het nadat ons ³⁷vantevore daartoe verordineer is ³⁸ooreenkomstig die voorneme van Hom wat ³⁹alles werk volgens die raad van sy wil,

sodat ons kan wees tot lof van sy heerlikheid, ons ⁴⁰wat reeds tevore op Christus ⁴¹gehoop het,

⁴²in wie ⁴³julle ook, nadat julle ⁴⁴die woord van die waarheid, die evangelie van julle redding, gehoor het, in wie julle, ⁴⁵nadat julle ook geglo het, ^l46verseël is met die Heilige Gees ⁴⁷van die belofte,

wat ⁴⁸die onderpand is van ons erfdeel ⁴⁹om sy eiendom ^mte verlos tot lof van sy heerlikheid.

ⁿDaarom — vandat ⁵⁰ek gehoor het van die geloof in die Here Jesus wat onder julle is en die liefde tot al die heiliges —

hou ek ook nie op om vir julle te dank as ek aan julle in my gebede dink nie,

dat die God van onse Here Jesus Christus, die Vader van die heerlikheid, aan julle die Gees van wysheid en openbaring ⁵¹in kennis van Hom ⁵²mag gee,

⁵³verligte oë van julle verstand, sodat julle kan weet wat ⁵⁴die hoop van sy roeping en wat ⁵⁵die rykdom van die heerlikheid van sy erfdeel ⁵⁶onder die heiliges is;

en wat die uitnemende grootheid van ⁵⁷sy krag is vir ons wat glo, ^ona die werking van die krag van sy sterkte

⁵⁸wat Hy gewerk het in Christus toe Hy Hom uit die dode opgewek het ^pen Hom ⁵⁹laat sit het aan sy regterhand in die hemele,

⁶⁰bo alle owerheid en mag en krag en heerskappy en ⁶¹elke naam wat genoem word, nie alleen in hierdie wêreld nie, maar ook ⁶²in die toekomstige.

^qEn Hy het ⁶³alle dinge onder ⁶⁴sy voete onderwerp en Hom ⁶⁵as Hoof bo alle dinge aan die gemeente gegee,

^rwat sy liggaam is, die ⁶⁶volheid van Hom wat alles in almal vervul.

a Rom. 1:7. 1 Kor. 1:2. 2 Kor. 1:1.

1 Sien oor hierdie hele opskrif van Paulus Rom. 1:1 en 1 Kor. 1:1, 2 se kanttekeninge.

2 Hierdie laaste titel voeg hy by as verklaring van die eerste, naamlik dat hy sodanige heiliges bedoel, wat deur die geloof en die Gees van Christus geheilig is, Hand. 15:8, 9. 1 Petr. 1:22; nie soos baie Jode hulleself heiliges genoem het omdat hulle uiterlik deur die seremonies geheilig was nie, Hebr. 9:13, 23.

b Gal. 1:3. 1 Petr. 1:2.

c 2 Kor. 1:3. 1 Petr. 1:3.

3 Die woord seën word in hierdie vers op tweërlei wyse gebruik. Want die mens seën God as hy Hom loof en dank, en God seën die mens wanneer Hy sy genade en weldade aan hom bewys. Albei is ’n Hebreeuse spreekwyse. Hier verwys die apostel na die woorde van die verbond: in jou nageslag sal al die nasies van die aarde geseën word, Gén. 22:18 en die kanttekening.

4 Dit is, God, wat die Vader van onse Here Jesus Christus is, 1 Kor. 15:24. Hierdie wyse van benaming van God word deur Paulus en ander apostels in die Nuwe Testament gebruik, in teenstelling met die Ou Testament, waar God in sodanige seëninge genoem word die Here, die God van Israel, of die God van Abraham, Isak en Jakob, met wie God eerste sy verbond gesluit het. Sien Luk. 1:68.

5 Dit is, allerlei.

6 Gr. in die hemelse, of allerhoogste, naamlik plekke, soos in vers 20 en Ef. 2:6. Hierdeur word te kenne gegee, dat God aan ons, asof vanaf sy troon, hierdie geestelike seëninge meegedeel het, en dat dit daartoe dien om ons in die hemele geluksalig te maak, Matt. 5:12. 1 Petr. 1:4. Hierdie seëninge word hierna tot vers 15 in die besonder beskryf.

7 Naamlik as in ons Hoof, om ons salig te maak. Sien verse 22, 23. Ef. 2:5-7; 4:15, 16. Sien ook Joh. 1:16. Filip. 3:20.

d Joh. 15:16. 2 Tim. 1:9.

e Luk. 1:75. Ef. 5:27. Kol. 1:22. 2 Tim. 1:9. Tit. 2:12.

8 Naamlik in Christus, as ons Hoof, soos in die voorgaande vers, om ons aan die beeld van sy Seun gelykvormig te maak, Joh. 17:6. Rom. 8:29. Of: deur Hom, Joh. 15:16, 19.

9 Naamlik uit die gewone groep verdorwe mense. Sien Joh. 15:16, 19. Rom. 8:29. 2 Thess. 2:13. 1 Petr. 1:1, 2, ens.

10 Dit is, van ewigheid af, soos hierdie spreekwyse oral gebruik word. Sien Joh. 17:24. 1 Petr. 1:20. Sien ook Ps. 90:2. Spr. 8:23.

11 Hieronder word ook die ware geloof verstaan, wat nooit sonder heiligheid is nie, net soos die heiligheid en liefde nie sonder die ware geloof kan bestaan nie; want deur die geloof word ons harte gereinig, Hand. 15:9. 1 Petr. 1:22. Dat ons ook uit genade in Christus tot die geloof uitverkies is, blyk uit Hand. 13:48. Rom. 8:30. 2 Tim. 1:9. Jak. 2:5.

12 Dit is, nie net voor die mense nie, soos die geveinsdes soms vir ’n tyd ook is, maar opreg soos in God se teenwoordigheid. Sien Gén. 17:1. Luk. 1:6. Hierdie heiligheid en onberispelikheid is in hierdie lewe wel opreg, en is deur die krag van God se Gees begin, maar sal in die toekomende lewe eers in alle opsigte volmaak word. Sien 1 Kor. 13:9. Ef. 5:27. Filip. 3:12, ens. Maar hierdie onvolmaakte heiligheid en onberispelikheid is in Christus Jesus ook in hierdie lewe vir God behaaglik, en as ’t ware volkome deur Hom aangeneem, omdat Hy ons ons gebreke deur die geloof in Christus vergewe en in Christus oorsien, Kol. 2:10. Hebr. 13:21. 1 Petr. 2:5, ens.

13 Sommige verstaan dit as die liefde waarmee God ons liefgehad het, en voeg dit by die voorgaande woord uitverkies. Dit kan egter gepas by die woorde wat volg, heilig en sonder gebrek, gevoeg word, en verstaan word as ons liefde teenoor God en die naaste, waarin hierdie heiligheid vernaamlik openbaar word. Sien 1 Kor. 13:1, ens. Gal. 5:6.

14 Naamlik van ewigheid af, soos in die voorgaande vers. Hier word ten opsigte van ons, die hoogste voleinding van ons verkiesing tot heerlikheid nader uitgedruk, naamlik ons aanneming tot kinders en erfgename van God, en mede-erfgename van Christus, waarvan ons hier wel die beginsels en verwagting het, Joh. 1:12. Rom. 8:15, maar die volle besit van hierdie kindskap en hierdie erfenis sal ons hiernamaals eers ontvang. Sien Rom. 8:23. Gal. 4:5. Hebr. 9:15. 1 Joh. 3:2.

15 Of: tot Homself, dit is, tot sy eer, om sy eie ontwil, vir Homself, aan Homself. Want God die Vader het ons in Christus as sy kinders en erfgename verordineer, Rom. 8:17.

16 Dit is, nie uit enige verdienste of waardigheid van ons kant nie, maar alleen deur sy onverdiende guns, genade en welbehae. Sien Rom. 9:11, 12, 15, 16; 11:6. 2 Tim. 1:9. Soos in die volgende vers ook verklaar word.

f Matt. 3:17.

17 Dit is, sodat sy heerlike genade deur ons geloof en geprys word; wat die uiteinde van hierdie ewige en genadige verkiesing van God is, Rom. 9:23.

18 Of: aangenaam gemaak het, naamlik vir Homself; soos hierdie woord ook in Luk. 1:28 vir die maagd Maria gebruik word.

19 Naamlik Christus, sy geliefde Seun, Matt. 3:17.

g Hand. 20:28. Kol. 1:14. Hebr. 9:12. 1 Petr. 1:18.

20 Naamlik in die geliefde Seun Jesus Christus. Want soos ons van ewigheid af in Hom uitverkies is tot die saligheid en tot die middele daarvan, soos in die drie voorgaande verse gesê is, so is ook die uitvoering van hierdie ewige voorneme van God in Hom en deur Hom op die regte tyd volbring.

21 Die Griekse woord beteken eintlik: ’n verlossing wat deur betaling van ’n losprys of prys plaasvind. Sien Matt. 20:28. 1 Kor. 6:20. 1 Petr. 1:18, ens.

22 Dit is, sy bloedige offer wat aan die kruis volbring is, Hebr. 9:12, ens.

23 Naamlik wat die eerste vrug is van hierdie verlossing vir diegene wat hul dit deur die geloof toe-eien, Rom. 3:24, 25, waarop die ewige saligheid volg, Rom. 8:30.

24 Dit is, sy uitnemend groot en oorvloedige genade, Rom. 2:4. Ef. 2:7.

25 Naamlik wanneer Hy aan ons deur sy evangelie en deur sy Gees hierdie dinge geopenbaar het, soos in vers 9 verklaar word.

26 Sommige verstaan dit as die wysheid van God wat Hy gebruik in die uitdeel van hierdie weldade, maar dit word beter verstaan as die wysheid wat God ons deur die evangelie skenk, naamlik die kennis van Hom en van Jesus Christus, ons Middelaar. Sien Joh. 17:3. 1 Kor. 1:24; 2:6, 7.

27 Of: wetenskap, wat ’n deug is waardeur hierdie wysheid met oorleg gebruik word tot eer van God en tot stigting van die naaste.

h Rom. 16:25. Ef. 3:9. Kol. 1:26. 2 Tim. 1:9. Tit. 1:2. 1 Petr. 1:20.

28 Dit is, die geheime raad van God van ons verlossing deur Christus, wat van nature aan geen mens bekend is nie; soos dit wat in die navolgende vers beskryf word ook ’n deel daarvan is. Sien 1 Kor. 2:8. Ef. 3:9. Kol. 1:26. 1 Tim. 3:16, ens.

29 Of: voorgestel, dit is, sonder om daartoe beweeg te wees deur iets buite Hom, of dat Hy vooruit iets in die mense gesien het, wat Hom daartoe sou kon beweeg, maar Hy het hierdie ewige besluit slegs uit sy eie wysheid, genade en barmhartigheid geneem, Rom. 11:34-36.

i Gén. 49:10. Dan. 9:24. Gal. 4:4.

30 Dit is, vanaf die vasgestelde tyd waarop God besluit het om sy Seun te stuur, en deur sy evangelie ook die heidene tot die gemeenskap van sy Seun te roep, sowel as die Jode. Sien Gal. 4:4.

31 Dit is, in of teen die tyd van die reëling. Die Griekse woord beteken sulke reëlings as wat ’n huisvader gebruik in die bestuur van sy huis, soos in elke situasie en behoefte, die tyd, persoon en optrede vereis word. So het God ook in sy huis, dit is, in sy gemeente, van die begin van die wêreld af sekere persone, optrede en tye beveel, waarop en waardeur alles gedoen en geopenbaar moes word.

32 Sommige verstaan daardeur die gelowiges wat reeds in die hemel is, en wat nog op die aarde is. Ander vergelyk hierdie teks met Kol. 1:16, 20, en meen dat deur diegene wat in die hemel is, die engele in die hemel verstaan moet word, wat saam met die gelowiges op aarde van alle eeue deur Christus onder Hom as Hoof vergader is, met mekaar vrede behou het, en só een liggaam geword het, wat tevore deur die sondes van die mense as ’t ware van mekaar afgeskeur was, Hebr. 12:22, 23. Openb. 19:10.

33 Gr. tot een Hoof, of tot een hoofsom saam te vat.

k Rom. 8:17.

34 Naamlik in Christus, as ons Hoof, soos tevore verklaar is.

35 Naamlik wat uit die Jode tot Christus bekeer is, soos ook in die volgende vers verklaar word.

36 Of: ’n lot verkry het, naamlik van die Here in sy gemeente. Dit wil voorkom of die apostel hier verwys na die verdeling van die erfenis van die land Kanaän deur die lot onder die twaalf stamme van Israel, wat ’n skaduwee en voorbeeld was van hierdie ewige erfenis wat deur ons ware Josua verkry is. Sien Núm. 26:55, ens.; 33:53. Jos. 13:6.

37 Dit is, nie almal wat die vleeslike saad van Abraham was nie, maar die kinders van die belofte, Rom. 9:8, en wat Hy vantevore uit genade onder hierdie volk uitverkies het, Rom. 11:2, 5-7.

38 Dit is, nie op grond van enige waardigheid in ons, of op grond van enige werk van ons kant nie, maar slegs uit genade, 2 Tim. 1:9. Dit voeg die apostel daarby, sodat die gelowiges uit die Jode nie sou meen dat daar iets meer in hulle as in die heidene was nie, as rede waarom hulle dié verordinering of voorbeskikking tot hierdie erfdeel waardig was. Sien Rom. 8:29, ens.

39 Naamlik wat die saligheid van Jode of heidene betref, waarvan hy hier spreek. Sien Filip. 2:13. Hoewel dit ook in die algemeen waar is van alle ander dinge, Ps. 115:3.

40 Naamlik uit die Jode, aan wie hierdie voorrang deur God beloof was. Sien Hand. 13:46. Rom. 15:8.

41 Naamlik deur die geloof in Hom. Want die geloof neem die beloftes aan, waarvan die hoop die vervulling verwag, Rom. 8:24, 25. Hebr. 11:1.

l Rom. 8:15. 2 Kor. 1:22; 5:5. Ef. 4:30.

42 Naamlik in Christus Jesus, soos tevore.

43 Of: julle ook tot ’n erfdeel geword het. Want soos hy van die gelowiges uit die Jode gespreek het, vers 11, so spreek hy nou van die heidene, wat saam ’n deel van die erfdeel ontvang het. Sien Hand. 26:17, 18.

44 So word die evangelie genoem, nie net omdat dit die enige waarheid van God is nie, aan ons op buitengewone wyse deur God tot ons saligheid geopenbaar, Joh. 17:17, maar ook omdat die waarheid van al die skaduwees van die Ou Testament daarin vervul is. Sien Joh. 1:17.

45 Of: toe julle ook geglo het. Want hierdie verseëling van die Gees gebeur deur die geloof, en ná die geloof, Gal. 3:2.

46 Hierdie spreekwyse is geneem van die mense, wat gewoonlik verseëlde briewe gegee het tot versterking van enige beloftes, en dít menigmaal met die afdruk van hul eie wapen of beeld. Die beloftes van die vergewing van ons sondes, van ons aanneming tot kinders en ons ewige erfenis, word aan ons gemaak deur die evangelie, en word deur die geloof ons toegeëien. Die verseëling van die Gees, wat daarby gevoeg word, is die wedergeboorte of vernuwing van die beeld van God in ons, waarmee Hy ons siele begiftig en dit daarop druk, as ons in Christus glo, om ons meer en meer te verseker van die uitvoering van hierdie beloftes van Hom, 2 Kor. 1:21, 22; 3:18. Dit betuig hierdie dinge boonop aan ons gemoed, soos met ’n goddelike inspraak, op grond waarvan ons ook God as onse Vader durf aanroep, Rom. 8:15. Gal. 4:6, en roem op die hoop van die heerlikheid van God, Rom. 5:2; 8:38, 39.

47 Dit is, wat aan ons beloof is. Of: waardeur die beloftes van God in ons verseker word.

m Ex. 19:5. Deut. 7:6; 14:2; 26:18. Rom. 8:23. 1 Petr. 2:9.

48 Gr. arrabon, sien oor hierdie woord 2 Kor. 1:22 se kanttekening; 2 Kor. 5:5. Sien ook Rom. 8:23. Ef. 4:30.

49 Of: tot die volle verlossing van sy verkreë of eie volk, 1 Petr. 2:9, dit is, tot die volle genieting van die verlossing, wat Christus vir ons verkry het. Gr. tot die verlossing van die verkryging.

n Filip. 1:3. Kol. 1:3. 1 Thess. 1:2. 2 Thess. 1:3.

50 Naamlik nie net deur by julle teenwoordig te wees nie, maar ook nou in my afwesigheid as gevolg van hierdie boeie van my, Ef. 6:20.

51 Of: met kennis van Hom, of: in erkenning van Hom. Want die ware wysheid bestaan nie net in die kennis van God nie, maar ook in die erkenning van sy genade en majesteit.

52 Dit is, mag gee dat julle meer en meer in die wysheid toeneem deur die Heilige Gees.

53 Dit verwys na die voorgaande woorde, mag gee. Ander lees: om verlig te wees na die oë van julle verstand.

54 Dit is, die verwagte saak, wat in die volgende woorde verklaar word. Sien 1 Petr. 1:3, 4.

55 Dit is, die oorvloedigheid, soos in vers 7.

56 Dit is, ware gelowiges. Want hierdie erfenis behoort nie aan die ander nie.

o Kol. 2:12.

57 Naamlik waardeur ons nou wedergebore is, en waarin ons meer en meer versterk word, totdat ons deur dieselfde krag hiernamaals ten volle na siel en liggaam verlos en verheerlik sal word. Want die apostel begeer nie net dat hulle dit weet nie, maar ook dat hulle volgens sy voorbeeld God sal bid dat die krag meer en meer in hulle geopenbaar mag word, die krag wat met baie voortreflike woorde deur hom bekend word.

p Ps. 110:1. Hand. 2:34. 1 Kor. 15:25. Kol. 3:1. Hebr. 1:3; 10:12. 1 Petr. 3:22.

58 Dit voeg die apostel daarby, omdat ons wedergeboorte en verheerliking ook van die opstanding en verheerliking van Christus afhang; en omdat dieselfde mag wat hierdie werk in Christus as ons Hoof bewerk het, ook in ons as sy ledemate werk, nie net ten opsigte van die komende opwekking uit die dood nie, maar ook die opwekking uit die geestelike dood van die sondes, soos verklaar word in Ef. 2:1, 4. Sien ook Rom. 6:4; 8:11. Filip. 3:21. 1 Petr. 1:3. 2 Petr. 1:3.

59 Deur die sit aan die regterhand van God word verstaan dat God Hom tot die hoogste mag en heerlikheid verhoog het; geneem as ’n beeld van prinse en konings, wat op hul troon sit, en aan hulle regterhand diegene wat naas hulle die magtigste en belangrikste in die koninkryk is, laat sit. Sien Ps. 45:10. Matt. 20:21. Soos dit ook verklaar word in Hebr. 1:3; 8:1. 1 Kor. 15:25, vergeleke met Ps. 110:1.

60 Hierdie titels word nie net gegee aan die vorste en magte in hierdie wêreld nie, maar ook aan die engele in die hemel, Kol. 1:16, bo wie Christus ver verhewe is, selfs na sy menslike natuur.

61 Naamlik van hoogheid en heerlikheid.

62 Dit verstaan sommige as die koninkryk van die hemel, of as die toestand van die hemelse wesens; maar aangesien hierdie toestand nou ook aanwesig is, word dit beter verstaan as die toestand van alle skepsele, selfs ná die voleinding van hierdie wêreld, wanneer die gelowiges verheerlik sal word en Christus nogtans, ook na sy menslike natuur, as die Hoof, ver verhewe sal bly bo alle skepsele. Sien Luk. 1:32, 33. Openb. 5:13, en deurgaans.

q Ps. 8:7. Matt. 28:18. 1 Kor. 15:27. Hebr. 2:8.

63 Dit is, ook selfs dit wat vreemd is, ja, vyande is van sy gemeente, 1 Kor. 15:25, 26.

64 Dit is, onder sy mag en gesag, Matt. 28:18.

65 Naamlik nie net om hulle te regeer nie, maar ook om hulle te beskerm, en aan hul die geestelike lewe en beweging te gee, soos die hoof aan die lede gee. Sien Ef. 4:8, 10, ens. Kol. 2:10, 19.

r Rom. 12:5. 1 Kor. 12:27. Ef. 4:16; 5:23.

66 Dit is, waardeur Christus as ’n volmaakte persoon voorgestel word, bestaande uit die Hoof en sy liggaam; soos die woord Christus soms vir albei gebruik word, sien 1 Kor. 12:12, 13, ten opsigte van hierdie noue vereniging wat tussen hulle is.