Openbaring 21

Die nuwe hemel en die nuwe aarde.

EN^a ¹ek het ²’n nuwe hemel en ’n nuwe aarde gesien, want die eerste hemel en die eerste aarde het ³verbygegaan; en ⁴die see was daar nie meer nie.

En ek, Johannes, het ^bdie heilige stad, ⁵die nuwe Jerusalem, sien ⁶neerdaal van God uit die hemel, ⁷toeberei soos ’n bruid wat vir haar man versier is.

En ek het ’n groot stem uit die hemel hoor sê: ^cKyk, ⁸die tabernakel van God is by die mense, en Hy sal by hulle woon, en hulle sal sy volk wees; en God self sal by hulle wees as ⁹hulle God.

^dEn God sal ¹⁰al die trane van hulle oë afvee, en daar sal ¹¹geen dood meer wees nie; ook droefheid en geween en ¹²moeite sal daar nie meer wees nie, want ¹³die eerste dinge het verbygegaan.

^eEn Hy wat op die troon sit, het gesê: Kyk, ^fEk maak alles nuut. En Hy het aan my gesê: Skryf, want hierdie woorde ^gis waaragtig en betroubaar.

En Hy het vir my gesê: ^hDit is ¹⁴verby! ⁱ¹⁵Ek is die Alfa en die Oméga, die begin en die einde. Aan ^16kdie dorstige sal Ek gee uit die fontein van die water van die lewe, ¹⁷verniet.

Hy wat oorwin, sal ¹⁸alles beërwe; ^len Ek sal vir hom ’n God wees, en hy sal vir My ’n seun wees.

Maar ^m19wat die vreesagtiges aangaan en die ongelowiges en gruwelikes en moordenaars en hoereerders en ²⁰towenaars en afgodedienaars en al die leuenaars — hulle deel is in die poel ⁿwat brand met vuur en swawel: dit is ²¹die tweede dood.

Die nuwe Jerusalem.

EN ²²een van die sewe engele ^owat die sewe skale gehad het, vol van die sewe laaste plae, het na my gekom en met my gespreek en gesê: Kom hierheen, ²³ek sal jou die bruid toon, die vrou van die Lam.

En hy het my ^p24in die gees weggevoer op ’n groot en ²⁵hoë berg en my ^qdie groot stad getoon, die heilige Jerusalem, ²⁶wat uit die hemel van God neerdaal;

²⁷en dit het die heerlikheid van God gehad, en sy ²⁸lig was soos ’n baie kosbare steen, soos die kristalhelder jaspissteen.

En dit het ²⁹’n groot en hoë muur met ³⁰twaalf poorte gehad, en by die poorte ³¹twaalf engele, en name daarop geskrywe, naamlik dié van die twaalf ³²stamme van die kinders van Israel.

³³Aan die oostekant was daar drie poorte, aan die noordekant drie poorte, aan die suidekant drie poorte, aan die westekant drie poorte.

^rEn die muur van die stad het ³⁴twaalf fondamente gehad, en daarop was ³⁵die name van die twaalf apostels van die Lam.

En hy wat met my gespreek het, ^shet ³⁶’n goue meetroede gehad, om die stad en sy poorte en sy muur te meet.

En die stad ³⁷het vierkantig gelê, en sy lengte was net so groot as sy breedte. En hy het die stad met die meetroede gemeet op ³⁸duisend-vyfhonderd myl; sy lengte en breedte en hoogte was gelyk.

En hy het ³⁹sy muur gemeet op ⁴⁰honderd-vier-en-veertig el, ⁴¹volgens ’n mens se maat, wat die maat van ’n engel is.

En die boustof van sy muur was jaspis, en die stad was suiwer goud soos ⁴²suiwer glas.

En ⁴³die fondamente van die muur van die stad was versierd met allerhande edelgesteentes. Die eerste fondament was jaspis, die tweede saffier, die derde chalcedoon, die vierde smarag;

die vyfde sardoniks, die sesde sardius, die sewende chrisoliet, die agtste beril, die negende topaas, die tiende chrísopraas, die elfde hiasint, die twaalfde ametis.

En ⁴⁴die twaalf poorte was twaalf pêrels; elkeen van die poorte was uit een pêrel, en ⁴⁵die straat van die stad was suiwer goud soos deurskynende glas.

En ’n ⁴⁶tempel het ek nie daarin gesien nie, want die Here God, die Almagtige, is sy tempel, en ⁴⁷die Lam.

^tEn die stad het ⁴⁸die son of die maan nie nodig om in hom te skyn nie, want die heerlikheid van God het hom verlig, ^ven die Lam is sy lamp.

^xEn die nasies van die wat gered word, sal ⁴⁹in die lig daarvan wandel, en ⁵⁰die konings van die aarde ⁵¹bring hulle heerlikheid en eer daarin.

^y52En bedags — ^zwant nag sal daar nie meer wees nie — sal sy poorte nooit gesluit word nie;

en hulle sal die heerlikheid en die ⁵³eer van die nasies daarin bring.

En daarin sal nie inkom iets wat ⁵⁴verontreinig en gruwelikheid en leuens doen nie; maar net die wat geskrywe is ^ain ⁵⁵die boek van die lewe van die Lam.

a Jes. 65:17; 66:22. 2 Petr. 3:13.

1 Naamlik daarna, toe die laaste oordeel gehou was; waarvan in die einde van die voorgaande hoofstuk gespreek is.

2 Dit is, ’n hemel en aarde wat vernuwe is, soos breedvoeriger aangeteken is in 2 Petr. 3:10 en die kanttekeninge. Sommige verklaarders verstaan dit ook as die nuwe gestalte van die kerk van Christus in hierdie wêreld, ná die bekering van die Jode, waarvan in die voorgaande hoofstuk breedvoeriger gespreek is. Hierdie mening is egter daar weerlê; en dat hier van die triomferende kerk van Jesus Christus in die hemel gespreek word, en van die stand daarvan ná die laaste oordeel, sal uit die hele verklaring genoeg blyk, in die besonder uit vers 4, en uit vers 22 en wat volg, wat nie op die stand van die kerk van Christus in hierdie wêreld van toepassing gemaak kan word nie; soos ook die meeste van die regsinnige verklaarders dit so verklaar.

3 Naamlik ten opsigte van hul teenswoordige stand, en vir soveel hulle die mense dien wat hier ’n natuurlike lewe lei, en ten opsigte van die nietigheid waaraan hulle as gevolg van die sondes van die mense onderworpe is. Sien Rom. 8:19, ens.

4 Sommige meen hieruit dat die see deur die vuur verteer en uitgedroog sal word, sodat daarvoor geen gebruik meer sal wees nie. Maar dat die hemel en die aarde, terwyl dit vernuwe en verheerlik is, altyd ’n gemeenskaplike woonplek van die heilige engele en salige mense sal bly, soos die engele ook nou soms op die aarde verskyn, hoewel die hemel hul eie woonplek is. Hierdie mening is egter onseker.

b vers 10. Openb. 3:12.

5 Hoewel die gemeente van Christus in die algemeen ook soms só genoem word, soos te sien is in Gal. 4:26. Hebr. 12:22, omdat Jerusalem daarvan ’n beeld en voorbeeld was, word die triomferende kerk van Christus en die plek van haar woning nogtans hier só genoem, omdat dan in haar volkome sal word wat in hierdie wêreld aan haar begin was. Sien Ps. 132:14.

6 Nie dat die woonplek van die salige gelowiges hiernamaals buite die hemel sal wees nie, want die teendeel word getuig in Joh. 14:2, 3. Filip. 3:20. 1 Thess. 4:17. Dit word egter gesê ten opsigte van die voorbeeld, of van die gesig wat Johannes daarvan gesien het, en ten opsigte van die krag waardeur dit alles teweeggebring is. Sien Hebr. 11:10. Openb. 3:12.

7 Naamlik soos in Openb. 19:7 gesê is, dat sy haar as ’n bruid gereed gemaak het, naamlik vir die koms van Christus, so word hier gesê dat sy reeds toeberei was; dit is, ten volle versier en verheerlik, om met Christus, haar Bruidegom, vir ewig verenig te bly. Sien Ef. 5:27.

c Eség. 43:7.

8 Dit is, die woning van God, naamlik nie net met sy genade en Gees, soos hier op aarde in sy gemeente ook gebeur nie, Joh. 14:23. 2 Kor. 6:16, maar ook met sy volkome heerlikheid en vreugde, wanneer Hy alles in almal sal wees, 1 Kor. 15:28. ’n Figuurlike spreekwyse, geneem uit die voorbeeld van die tabernakel in die Ou Testament. Sien Lev. 26:11.

9 Naamlik wat hulle van alle kwaad sal bevry, en met alle goed, na liggaam en siel, oorvloeiende sal vervul. Sien 1 Kor. 2:9; 13:12; 15:43. 2 Kor. 3:18. Filip. 3:21.

d Jes. 25:8. Openb. 7:17.

10 Sien Jes. 25:8. Openb. 7:17.

11 Naamlik onder diegene wat in hierdie hemelse Jerusalem woon. Andersins bly die dood altyd in die poel van vuur, waarin hy volgens Openb. 20:14 gewerp is.

12 Of: arbeid.

13 Naamlik van kruis en lyding van die gelowiges, en van al die ander ellendighede en moeite van hierdie teenswoordige lewe.

e Openb. 4:2; 20:11.

f Jes. 43:19. 2 Kor. 5:17.

g Openb. 19:9.

h Openb. 16:17.

i Jes. 41:4; 44:6. Openb. 1:8; 22:13.

k Jes. 55:1.

14 Of: gedoen, het geskied, dit is, alles is volbring wat deur die profete in die Ou, en deur die apostels in die Nuwe Testament vooruit aangekondig is. Sien Openb. 16:17.

15 Sien Openb. 1:8.

16 Hierdie woorde van Christus kom ooreen met Joh. 7:37. Sien die kanttekening daar.

17 Dit is, uit genade, sonder enige verdienste van hulle kant, Ef. 2:8.

l Sag. 8:8. Hebr. 8:10.

18 Dit is, die volheid van alle geestelike en ewige goedere, na siel en na liggaam. Sien Rom. 8:17, 29. 1 Joh. 3:2.

m Openb. 22:15.

n Openb. 20:14, 15.

19 Hulle word hier gestel teenoor diegene van wie in die voorgaande vers gesê is dat hulle oorwin, naamlik dapper en standvastig al die swarighede wat hulle ter wille van die belydenis van die evangelie oorkom. Sien Rom. 8:37. Hierdie vreesagtiges is dus diegene wat in die tyd van verdrukking en vervolging uit vrees afwyk, Matt. 13:21.

20 Of: gifmengers.

21 Sien Openb. 20:14.

o Openb. 15:6, 7.

22 Naamlik wat Johannes in Openb. 17:3 in die woestyn weggevoer het, en die oordeel oor die groot hoer getoon het; wat nou aan hom die bruid van Christus en die hemelse Jerusalem toon, as ’n einde van alle gesigte.

23 Dit is, die verheerlikte gemeente van Christus met haar woonplek. Sien Openb. 19:7. Waaruit blyk dat in hierdie gesig nie net die heerlikheid van die plek getoon word waar die uitverkorenes hulle altyd met Christus sal verbly nie, maar ook vernaamlik die heerlikheid van die gemeente van Christus self, met haar eienskappe, soos sy hiernamaals in die hemel sal wees.

p Openb. 1:10.

q vers 2. Hebr. 12:22.

24 Dit is, in ’n verrukking van sinne, of in ’n gesig. Sien Openb. 1:10.

25 Naamlik om van daar die ligging van hierdie hemelse Jerusalem des te beter te kan sien; soos die stad Jerusalem, wat ’n voorbeeld hiervan was, die beste gesien kon word van die top van die berg Sion af, Ps. 24:3. Jes. 2:2, ens.

26 Sien vers 2 se kanttekening.

27 Naamlik wat oor haar geskyn en haar verheerlik het; soos van God self gesê word dat Hy ’n ontoeganklike lig besit, 1 Tim. 6:16 en die kanttekening.

28 Of: glans.

29 Hiermee word die onoorwinlike vastigheid en sekerheid van die verheerlikte gemeente van God in die hemel aangedui, God is deur sy almag soos ’n vaste muur om hulle, en sal dit altyd bly. Sien Sag. 2:5. Matt. 16:18.

30 Naamlik aan elke kant drie poorte, soos hierna verklaar word. Waardeur te kenne gegee word dat alle gelowiges uit al die geweste van die wêreld tot hierdie stad toegang sal hê; soos Christus ook spreek in Matt. 8:11.

31 Naamlik as troue wagters, sodat in hierdie stad niks sou uitgaan of inkom nie, behalwe dit wat rein was en daar behoort het; soos in vers 27 verklaar word, en soos ook oor die ingang van die paradys geskryf word in Gén. 3:24.

32 Of: geslagte, naamlik van die ware Israel van God, uit al die geslagte van die aarde uitverkies en byeengebring. Sien Rom. 11:26. Openb. 7:4.

33 Dit dui nie op die uiterlike Jerusalem nie, wat aan die een kant geen poorte gehad het nie, omdat dit teen ’n steil helling gelê het; maar óf op die Jerusalem van die Nuwe Testament, wat Eségiël ook so gesien het, maar met kleiner afmetings, Eség. 48:31; óf ook op die laer van die Israeliete in die woestyn, wat in ’n vierkant geleë was en vir elke stam ’n poort gehad het. Sien Núm. 2:2, ens.

r Ef. 2:20.

34 Naamlik van kosbare stene wat goed bo-op of langs mekaar gevoeg is, soos in verse 19, 20 verklaar word. Waardeur die leer van die twaalf apostels te kenne gegee word, waarvan Christus Jesus die kosbare hoeksteen is, waarop die gemeente van Christus hier gebou is en in der ewigheid gebou sal wees; soos Paulus getuig in Ef. 2:20.

35 ’n Beeld, so wil dit voorkom, geneem van die gebruik van die bouers van groot geboue, wat gewoonlik tot sekere gedagtenis hul name op die fondamentstene graveer of inkap. So word hier ook van die twaalf apostels gespreek, omdat hulle almal aan hierdie stad gebou het, en geen ander fondament gelê het as Jesus Christus nie; maar elkeen in verskillende mate en voortreflikheid, soos hierdie kosbare stene onderskeie voortreflikheid het, en soos Paulus ook van homself en ander spreek, 1 Kor. 3:10, 11.

s Eség. 40:3. Sag. 2:1.

36 Dit verwys na Eség. 40:3, waar dergelike afmeting van die nuwe Jerusalem en van die tempel plaasvind, om te wys dat hier alles volgens God se bevel en beskikking sal gebeur.

37 Gr. lê vierhoekig. Dit word só gesê, omdat hierdie figuur die soliedste en onbeweeglikste is.

38 Of: twaalfduisend stadia, [ongeveer tweeduisend tweehonderd en twintig kilometer]. Waardeur te kenne gegee word dat die gemeente van Christus in die hemel baie groot sal wees; en nogtans só dat haar eie woonplek, as ’n hemelse paradys, van ander plekke afgesonder sal wees en bly.

39 Dit is, die hoogte van daardie muur.

40 Honderd-vier-en-veertig is ’n vierkantsgetal, naamlik twaalf maal twaalf met mekaar vermenigvuldig, volgens die getal van die twaalf apostels, en van die twaalf stamme van Israel wat hier genoem is. Waardeur nie net die vrugbaarheid of vermenigvuldiging van die lede van Christus deur die apostoliese leer nie, maar ook die onbeweeglike vastigheid en sekerheid van hierdie gemeente in die hemel te kenne gegee word.

41 Dit is, wat die mens gewoond is om te gebruik, in watter gedaante die engel hier aan Johannes verskyn het.

42 Die aardse goud is op sigself nie deurskynend nie, maar slegs blink en suiwer, maar hierdie goud het bowendien die eienskap van suiwer glas en word gevoeg by jaspis en ander kosbare stene, wat hier die een ná die ander genoem word, om daardeur te kenne te gee dat al die dele van hierdie hemelse Jerusalem, van binne en van buite, en al die inwoners daarvan, elkeen voor God en onder mekaar, die suiwerste, heerlikste, heiligste en aangenaamste sal wees, volgens die maat van die gawes van Christus.

43 Naamlik waarop die muur gefundeer was; sien daaroor vers 14.

44 Hierdie poorte word volgens die getal van die twaalf stamme van Israel aangedui, soos in vers 12 aangetoon is. Daardeur kan die menigte van al die getroue leraars en ander voorgangers van die gemeente gepas verstaan word, wat soos pêrels die gewone goud oortref, en deur wie, as instrumente van God, volgens die voorbeeld van die twaalf apostels, die ware Israeliete sowel van die Ou as die Nuwe Testament in die gemeenskap van hierdie kerk van Christus altyd gekom het. Sien 1 Kor. 3:8.

45 Of: die mark, die plein; waardeur gewoonlik dié plek van die stad verstaan word, waar die byeenkomste van die burgers en ook die regspraak gehou word, waarvan hier gesê word dat dit ook van suiwer goud en deurskynend soos glas is, omdat alles vreedsaam, opreg en sonder geskil onder die lede van hierdie gemeente sal gebeur.

46 Naamlik geen uiterlike tempel of tempelbenodigdhede nie, soos die uiterlike Jerusalem gehad het, ook met goud en kosbare stene versier; want dit het gedien tot ’n beeld van die toekomende goedere; of het ook gedien om die prediking van die Woord van God, die sakramente en ander uitwendige godsdienstige verrigtinge te hou, wat alles dan sal ophou, wanneer hulle almal deur God alleen geleer sal wees, Jer. 31:34, en Hy self alles in almal sal wees, 1 Kor. 13:10; 15:28.

47 Dit is, Christus self, wat as waaragtige God met die Vader en Heilige Gees heerlikheid aan die gemeente sal verleen, en alles in almal sal wees.

t Jes. 60:19. Sag. 14:7.

v Openb. 22:5.

48 Naamlik om daardeur die onderskeid van dae of tye af te meet, omdat daar geen nag sal wees nie, maar ’n ewigdurende lig, soos die volgende vers verklaar; ook nie om ons uitwendig te verlig nie, omdat God se heerlikheid en sy ontoeganklike lig wat Hy bewoon, alle ander ligte sal verduister. Hierdie teks verwys na Jes. 60:19, waar dergelike geprofeteer word, nie net van die tye van die Nuwe Testament, vergeleke met die tye van die Ou Testament nie, maar in die besonder van die vervulling wat hiernamaals sal gebeur.

x Jes. 60:3.

49 Dit is, die heerlikheid van die hele gemeente ook deelagtig wees, soos Christus sê in Matt. 8:11, dat hulle saam met Abraham, Isak en Jakob sal aansit in die koninkryk van God.

50 Naamlik wat gelowig geword het. Hierdie woorde is ook geneem uit Jes. 60:3.

51 Nie dat hierdie koninklike mag daar nog sal voortduur nie, want Paulus getuig die teendeel in 1 Kor. 15:24, maar dat selfs die konings, wat hier in groot heerlikheid was, hul deel ook sal hê in die heerlikheid van hierdie gemeente, in so ’n mate wat God sal behaag om hulle mee te deel.

y Jes. 60:11.

z Openb. 22:5.

52 Hierdie spreekwyse is ook geneem uit Jes. 60:11, en gee te kenne dat al die uitverkorenes daar altyd toegang sal hê, en dat hulle in so ’n vrede en gerustheid sal wees dat hulle geen vyande meer hoef te vrees nie, of iets wat hulle, of wat aan hulle behoort, kan skaad nie.

53 Sien vers 24.

a Ex. 32:32. Ps. 69:29. Filip. 4:3. Openb. 3:5; 20:12.

54 Of: onreinheid bedryf, soos Paulus ook verklaar in 1 Kor. 6:9, 10.

55 Dit is, wat van ewigheid af uit genade daartoe verkies is, en in die tyd kragtig daartoe geroep en gebring is. Sien Rom. 8:29, 30. Openb. 13:8.