Die getal stede wat aan die Leviete afgestaan moes word. Die ses vrystede.

EN die HERE het met Moses gespreek in die vlaktes van Moab, by die Jordaan van Jérigo, en gesê:

^aGee bevel aan die kinders van Israel dat hulle aan die Leviete van hulle ¹erflike besitting stede gee om te bewoon; ook moet julle ²weiveld rondom die stede aan die Leviete gee.

En die stede moet vir hulle dien om te bewoon; maar die weiveld wat daarby behoort, moet vir hulle diere en hulle besitting en al hulle lewende hawe wees.

En die weiveld van die stede wat julle aan die Leviete gee, moet van die stadsmuur af buitentoe duisend el rondom wees.

En julle moet buitekant die stad meet: aan die oostekant ³tweeduisend el en aan die suidekant tweeduisend el en aan die ⁴westekant tweeduisend el en aan die noordekant tweeduisend el, en die stad in die middel. Dit moet vir hulle as weiveld van die stede dien.

^bEn die stede wat julle aan die Leviete gee, moet die ses ⁵vrystede wees wat julle moet gee, dat die een ⁶wat ’n doodslag begaan het, daarheen kan vlug; en daarby moet julle twee-en-veertig stede gee.

Al die stede wat julle aan die Leviete gee, moet wees agt-en-veertig stede, hulle saam met hul weiveld.

En wat die stede betref wat julle uit die besitting van die kinders van Israel gee — julle moet van die wat ⁷baie is, ⁸baie neem, en van die wat min is, min neem; elke stam moet van sy stede aan die Leviete gee volgens die erfdeel wat elkeen gaan kry.

Verder het die HERE met Moses gespreek en gesê:

Spreek met die kinders van Israel en sê vir hulle: ^c9As julle deur die Jordaan na die land Kanaän trek,

¹⁰moet julle gunstig geleë stede vir julle uitsoek; as vrystede moet hulle vir julle dien, dat die een wat ’n doodslag begaan het, een wat ¹¹per ongeluk ’n ¹²mens doodgeslaan het, daarheen kan vlug.

En die stede moet vir julle as toevlug dien vanweë die ¹³bloedwreker, sodat hy wat ’n doodslag begaan het, nie ¹⁴sterwe voordat hy voor die vergadering gestaan het om geoordeel te word nie.

En die stede wat julle gee, moet vir julle, ses in getal, as vrystede dien.

^dDrie van die stede moet julle oos van die Jordaan gee, en drie daarvan moet julle in die land ¹⁵Kanaän gee; vrystede moet hulle wees.

Vir die kinders van Israel en die vreemdeling en die bywoner onder hulle moet hierdie ses stede as toevlug dien, sodat elkeen daarheen kan vlug wat per ongeluk ’n mens doodgeslaan het.

Maar as hy hom ¹⁶slaan met ’n ystervoorwerp, sodat hy sterwe, dan is hy ’n moordenaar; die moordenaar moet ¹⁷sekerlik ¹⁸gedood word.

En as hy hom slaan met ’n ¹⁹klip in die hand — waardeur iemand kan sterwe — en hy sterwe, dan is hy ’n moordenaar; die moordenaar moet sekerlik gedood word.

Of as hy hom slaan met ’n houtvoorwerp in die hand — waardeur iemand kan sterwe — en hy sterwe, dan is hy ’n moordenaar; die moordenaar moet sekerlik gedood word.

Die bloedwreker, hy moet die moordenaar ²⁰doodmaak; as hy hom kry, moet hy hom doodmaak.

^eEn as hy hom uit haat stamp of met opset na hom gooi, sodat hy sterwe,

of hom uit vyandskap met sy hand slaan, sodat hy sterwe, dan moet hy wat geslaan het, sekerlik gedood word; hy is ’n moordenaar; die bloedwreker ²¹moet die moordenaar doodmaak as hy hom kry.

Maar as hy hom onvoorsiens, sonder vyandskap, stamp of enigiets sonder opset na hom gooi;

of as hy enige klip waardeur iemand kan sterwe — as hy, ²²sonder om dit te sien, dit op hom laat val, sodat hy sterwe, terwyl hy geen vyand van hom was en sy ²³onheil nie gesoek het nie,

dan moet die vergadering tussen hom wat doodgeslaan het, en die bloedwreker oordeel volgens hierdie voorskrifte.

En die vergadering moet hom ²⁴wat ’n doodslag begaan het, red uit die hand van die bloedwreker, en die vergadering moet hom laat teruggaan na sy vrystad waarheen hy gevlug het; en hy moet daarin bly tot ²⁵die dood van die hoëpriester wat met die ²⁶heilige olie gesalf is.

Maar as hy wat ’n doodslag begaan het, ²⁷ooit buitekant die grens van sy vrystad gaan waarheen hy moes vlug,

en die bloedwreker hom buitekant die grens van sy vrystad kry, en die bloedwreker hom doodslaan wat ’n doodslag begaan het, dan sal daar vir hom geen ²⁸bloedskuld wees nie.

Want hy moet in sy vrystad bly tot die dood van die hoëpriester; maar ná die dood van die hoëpriester mag die een wat ’n doodslag begaan het, ²⁹teruggaan na die land waar sy besitting lê.

En dit moet vir julle ’n regsinsetting wees in julle geslagte, in al julle woonplekke.

As iemand ³⁰’n mens doodslaan, ^fmoet die moordenaar op verklaring van getuies ³¹gedood word; maar een getuie is nie genoegsaam om iemand ³²tot die dood te veroordeel nie.

Maar julle mag ³³geen losgeld aanneem vir die lewe van ’n moordenaar ³⁴wat skuldig is om te sterwe nie, want hy moet sekerlik gedood word.

Ook mag julle geen geld aanneem om iemand vry te stel ³⁵van die vlug na sy vrystad — sodat hy kan teruggaan om in die ³⁶land te woon — tot op die dood van die hoëpriester nie.

En julle mag die land nie ontheilig waar julle in is nie; want die bloed ontheilig die land, en vir die land word geen versoening gedoen vir die bloed wat daarin vergiet is nie, as net deur die bloed van hom wat dit vergiet het.

En jy mag die land waar julle in woon, nie verontreinig nie, omdat Ek daarin woon; want ³⁷Ek, die HERE, woon in die midde van die kinders van Israel.